Жеңістің 80 жылдығына және Жаркент шегара отрядының құрылғанына 101 жыл толуына орай Панфилов шегара басқармасының мұрындық болуымен өткен 80 шақырымдық марафонға әскерилер қатысты.
Жаркент шегара отряды 1924 жылы 12 сәуірде құрылған еді. Бұл жасақ ғасырдан астам уақыттан бері еліміздің оңтүстік-шығысындағы шегара шебін мүлтіксіз күзетіп келеді. Қос мерекеге орай өткен марафонда Ұлттық қауіпсіздік комитетінің Жетісу облыстық шегара басқармасында қызмет ететін офицерлер Асқар Талғатов, Ернар Ысқақов, Абай Сапаров және Тасқын Хамитжановтар алдына қара салмай, жарысты қорытындылады. Ел шебіндегі Қарақұм шегара бөлімшесінен таңғы сағат төртте жүгіріп шыққан марафоншылар қиындыққа толы қалың тоғайлы, құм төбелерді басып өтіп, мәреге жетті. Желаяқ сарбаздарды Панфилов шегара басқармасы бастығының орынбасары Әлішер Сламбеков салтанатты жағдайда марапаттады.
– Адамзат баласына зардабы мен залалын тигізген сұм соғыстың аяқталғанына биыл 80 жыл толып отыр. Елімізден майданға 1,5 млн. боздақ аттанып, шайқас даласында қиянкескі ұрыста ерлік көрсетті. Нәтижесінде Қазақстаннан 500-ден астам Кеңес Одағының Батыры шықты. Алайда қанша боздақ ұрыс өткен аймақтарда қалды. Сондықтан бұл Жеңіс біз үшін аса құнды, құрметті. Еліміздің оңтүстік-шығыс шегара шебін жүз жылдан астам уақыттан бері абыройлы күзетіп келе жатқан Жаркент шегарашыларының даңқы да елеусіз қалмауы керек. Қос мерейлі мерекені ұштастырған марафонда оқ бойы озық болған әріптестерімізді құттықтаймыз, – деді Әлішер Сламбеков.
Марафоншыларды марапаттау рәсімі Екінші дүниежүзілік соғысқа қатысушыларға қойылған ескерткіш маңында өтті. Шарада шегара қызметінің ардагері Георгий Полусмаков бейбітшілік пен тыныштық орнаған еліміздің көгін бұлт шалмасын деген тілек арнады.
Мырзағали НҰРСЕЙІТ
