Шерзат Полатқа қатысты сот отырысында оқиғаның негізгі орын алған жері – Қамажай дүкеніндегі бейнебақылау жазбалары жария етілді.
Кадрларда оқиға түнгі сағат 00:33 шамасында басталғаны анық көрінеді. Дәл осы уақытта сотталушының ағасы Нұрғанат Ғайыпбаев дүкенге кірген. Ал дүкен сыртында тұрған Дархан Әскентай өзінің танысы Нұрбол Тоқтаубаевқа хабарласып, оны алып кетуін сұрайды. Сағат 00:42-де Нұрбол оқиға орнына жеткен.
Сот отырысы барысында қорғаушы тарап бейнематериалдарға сілтеме жасап:
– Құрметті сот, Қаржаубай Нұрымовтың қолындағы затқа назар аударуыңызды сұраймыз, — деді.
Жәбірленуші тараптың адвокаттары Нұрымовтың қолында пышақ болғанын жоққа шығармағанын атап өтті. Сонымен қатар, Дархан Әскентай Нұрымовтың пышақты көрсетіп, оны сермегенін жеткізді.
Іс бойынша тергеу мен сот отырыстары жалғасуда. Тараптар арасында даудың мән-жайы мен кінәлілердің әрекеттері алдағы уақытта толық анықталмақ.
