Талдықорғанда полиция қызметкерлері мас күйінде көлік жүргізген ер адамды ұстады. Оқиға тұрғын үйлердің бірінің ауласында болған. Honda маркалы көлікті басқарған азамат кері жүріп келе жатып, Hyundai көлігіне соқтығысқан.
Тексеру барысында ер адамның бұған дейін де дәл осындай құқық бұзушылық жасағаны анықталды. Ол 2022 жылы мас күйінде көлік басқарғаны үшін екі жылға бас бостандығынан айырылып, жеті жыл мерзімге жүргізуші куәлігінен айырылған екен. Жазасын өтеген соң да заң талабын ескермей, тағы да айналасындағылардың өміріне қауіп төндірген.
ҚР Қылмыстық кодексіне сәйкес, көлік құралын қайтадан мас күйінде басқару – ауыр қылмыс болып есептеледі. Мұндай әрекет үшін 4 жылдан 6 жылға дейін бас бостандығынан айыру, сондай-ақ өмір бойына көлік жүргізу құқығынан және белгілі бір лауазымдарды атқару құқығынан айыру жазасы қарастырылған.
Қазіргі уақытта аталған дерек бойынша тергеу амалдары жүргізілуде. Құқық қорғау органдары мұндай қайталанған әрекеттердің қоғамға аса қауіпті екенін атап өтіп, заң аясында қатаң жаза қолданылатынын ескертеді.
«Жетісу-Ақпарат»
