ҚР Премьер-Министрінің баспасөз қызметінің хабарлауынша, Виктория Шегай еңбек және халықты әлеуметтік қорғау вице-министрі қызметіне тағайындалды, деп хабарлайды 7-su.kz ақпараттық порталы.
Виктория Владимировна Шегай 1981 жылы Шымкент қаласында дүниеге келген. Ол Қожа Ахмет Ясауи атындағы Халықаралық қазақ-түрік университетін, Мирас университетін, сондай-ақ Сәтбаев атындағы Қазақ ұлттық техникалық зерттеу университетін тәмамдаған.
Еңбек жолын 2004 жылы Алматы қаласындағы «Мемлекеттік жинақтаушы зейнетақы қоры» ЖАҚ-тың есеп айырысу операциялары бөлімінде жетекші маман болып бастаған.
2004–2017 жылдар аралығында зейнетақы жүйесінде түрлі лауазымдарда – жетекші маманнан департамент директорына дейінгі қызметтерді атқарды.
2017–2018 жылдары «Мемлекеттік әлеуметтік сақтандыру қоры» АҚ-да штаттан тыс қызметкер ретінде жұмыс істеген.
2018–2022 жылдары Еңбек және халықты әлеуметтік қорғау министрлігінде түрлі басшылық лауазымдарда болды: әлеуметтік сақтандыру, базалық әлеуметтік және зейнетақымен қамсыздандыру саясаты департаментінің басқарма басшысы, кейін директоры қызметтерін атқарған.
2022–2023 жылдары министрлікке қарасты «Еңбекті қорғау жөніндегі республикалық ғылыми-зерттеу институты» ШЖҚ РМК-да аға ғылыми қызметкер, сондай-ақ реттеу саясаты секторының басшысы болып еңбек етті.
2023 жылдың желтоқсан айынан бастап вице-министр болып тағайындалғанға дейін Еңбек және халықты әлеуметтік қорғау министрлігінің әлеуметтік қамсыздандыру және әлеуметтік сақтандыру департаментінің директоры қызметін атқарған.
