Жетісу облысының Алакөл ауданында мемлекеттік меншікке тиесілі жер учаскесін заңсыз пайдаланған кәсіпкерлік субъектісі әкімшілік жауапкершілікке тартылды. Бұл туралы ҚР Ауыл шаруашылығы министрлігінің баспасөз қызметі хабарлады.
Жер ресурстарын басқару департаментінің жоспардан тыс тексерісі барысында бір заңды тұлғаның арнайы рұқсат құжаттарынсыз құм-қиыршықтас қоспасын өндірумен айналысқаны анықталған.
– Тексеру нәтижесінде жер ҚР Жер кодексінің нормаларын бұза отырып пайдаланылғаны белгілі болды. Аталған құқықбұзушылық бойынша әкімшілік іс қозғалып, нәтижесінде 2,7 миллион теңге көлемінде айыппұл салынды, – делінген министрлік мәліметінде.
Қазіргі уақытта заңсыз әрекеттер тоқтатылып, жер учаскесін өз бетінше пайдалану жойылған.
Жетісу облысы бойынша Жер ресурстарын басқару департаменті жер заңнамасының бұзылуына жол бермеу мақсатында тексеру және алдын алу жұмыстарын тұрақты түрде жүргізіп келеді.
«Жетісу-Ақпарат»
