Қазақстандағы мемлекеттік дәрі-дәрмек дистрибьюторы – «СК-Фармация» компаниясы қоғам мен ҚР Парламенті Сенатының депутаттары тарапынан қатаң сынға ұшырады.
Бұған себеп – мемлекеттен бөлінген 500 миллиард теңгеге қарамастан, халықтың тегін дәрі-дәрмекке қол жеткізе алмауы. Сарапшылар бұл қаражаттың жартысы тиімсіз жұмсалуы мүмкін екенін айтуда. Басты себептердің бірі – ескі қағазбастылық жүйесі, сондай-ақ цифрлық бақылау жүйесінің тоқтатылуы.
Халық дәрі-дәрмектің тапшылығына, кей препараттардың мүлдем жоқтығына немесе арзан аналогтармен алмастырылуына шағымдануда. Бұл жағдай сенаторлар мен сарапшыларды алаңдатып отыр. Мәселен, депутат Айнұр Арғынбекова дәрі-дәрмек қолжетімділігін арттыру үшін реформалар ұсынып, науқастарға бірдей дәрі-дәрмекті бірнеше рет жаздыру үшін әр жолы дәрігерге бару талабын алып тастауды ұсынды.
Ал «СК-Фармация» компаниясы болса, кідірістерге шетелдік жеткізушілер мен өндірістік қиындықтарды, табиғи апаттар мен логистикалық мәселелерді себеп қылып отыр.
Айта кетейік, бұл – «СК-Фармацияның» алғашқы дауы емес. Бұған дейін де жалған рецептер, дәрі тапшылығы мен бақылаудың жоқтығы секілді жайттар анықталған.
«Жетісу-Ақпарат»
Коллаж: Ulysmedia
