ІІМ чемпионатында Жетісу облысының полицейлері жоғары нәтиже көрсетті, – деп хабарлайды Polisia.kz.
«Заң және тәртіп» тұжырымдамасын іске асыру аясында және «Динамо» спорт қоғамының 100 жылдығына орай Павлодар қаласында Қазақстан Республикасы Ішкі істер министрлігінің жауынгерлік атыс бойынша чемпионаты өтті.
Атыс алаңында еліміздің әртүрлі құқық қорғау, арнайы және күш құрылымдарын таныстыратын 26 командадан 130 қызметкер өз кәсіби шеберліктерін көрсетті. Бағдарламада Калашников автоматын (қашықтығы 100–150 метр) және Макаров тапаншасын (қашықтығы 25 метр) ату бойынша жаттығулар қамтылды. Сайыс командалық және жеке есепте өтті.
Жетісу облысы полиция департаменті бұл беделді турнирде аймақ намысын абыроймен қорғады. Чемпионат қорытындысы бойынша өңір полицейлері жеке жаттығуларда жүлдегерлер қатарынан көрінді: ПМ-3 жаттығуы (Макаров тапаншасынан ату): 2-орын — Ерлан Шалғынбаев. Ал 3-орын — Есен Мүсекенов. Әйелдер арасындағы ПМ-5 жаттығуынан 3-орынға Айым Кенжебекова жайғасты.
Бұл жеңіс көп жылдық жүйелі дайындықтың, жеке жауапкершіліктің және ұжымдық ауызбіршіліктің нәтижесі саналады.
