Жеңіс күні қарсаңында Ескелді ауданы, Жетісу ауылының тұрғыны, тыл ардагері Балшекер Тайжанованың үйіне арнайы құрылған медициналық топ барып, тегін профилактикалық тексеру жүргізді. Бұл шара ардагерлерге құрмет көрсетіп, олардың денсаулығына назар аудару мақсатында ұйымдастырылды.
Дәрігерлік топ құрамында аудандық аурухананың білікті дәрігерлері – невропатолог, хирург және терапевт мамандар тыл ардагерінің жалпы жағдайын тексеріп, қан қысымы мен жүрек қағысын бақылап, артериялық қысым, жүйке жүйесінің жағдайы, буындардың қозғалысы сынды денсаулығына мән берді.
Балшекер Тайжанова Екінші дүниежүзілік соғыс жылдарында тылда еңбек еткен ардақты ана. Ардагер егіс алқаптарында, астық бастыру науқандарында аянбай еңбек еткен. Бүгінде 87 жасқа келген ауыл тұрғыны 7 баланың анасы, 43 немере мен 22 шөберенің сүйікті әжесі.
Шараға қатысқан Төлеңгіт ауылдық округінің әкімі Расул Сүйінбай:
– Біз тарихын ұмытпаған елміз. Балшекер апамыз сынды ардагерлеріміздің өмір жолы – біз үшін үлкен тағылым. Сондықтан әрбір ардагер құрмет пен қамқорлыққа лайық, – деп қарт анаға денсаулық тіледі.
Аудандық аурухананың дәрігері Саят Қанатұлы ардагерлерге медициналық көмек көрсету азаматтық әрі кәсіби міндет екенін айтып, ұжымдық жауапкершілік туралы ой қозғады.
Тыл ардагерінің балалары мен немерелері жергілікті әкімдік пен дәрігерлерге алғыс білдірді.
Жеңіс күніне орай Ескелді ауданында ұйымдастырылған шара алдағы уақытта да жалғасын таппақ.
Санжар СҰЛТАНҒАЗЫ
