Қазақстан Республикасы Денсаулық сақтау министрлігі Дәрілік саясат департаментінің директоры Жандос Әділхан елдегі дәрі-дәрмек бағасына қатысты мәлімдеме жасады.
Бұл туралы 7-su.kz желілік басылымы хабарлайды.
Жандос Әділханның айтуынша, министрлік дәрі-дәрмек пен медициналық бұйымдардың бағасын реттеуге бағытталған нақты жұмыстар жүргізіп жатыр. 2024 жылдың соңында дәрілік заттар мен медициналық бұйымдардың бағасын белгілеу ережелеріне заңнамалық өзгерістер енгізілген. Бұрын дәрі бағасына кедендік салық, маркетингтік шығындар, тасымалдау және басқа да қосымша шығындар «пайыздың үстіне пайыз» қағидаты бойынша қосылатын. Енді бұл тәсіл өзгертіліп, халықаралық тәжірибеге сүйене отырып, баға саясаты қайта қаралды.
— Жаңа ереже бойынша, зауыттан шыққан дәрі-дәрмек соңғы тұтынушыға жеткенге дейінгі бағасы қымбаттамай, бірқалыпты сақталады. Қазір тек дистрибьютор шығындары мен өзіндік құны ғана есепке алынады, — деді департамент басшысы.
Оның айтуынша, халықты сапалы әрі қолжетімді дәрі-дәрмекпен қамтамасыз ету — басты мақсат. Сонымен қатар, бұрын фармацевтикалық компаниялар дистрибьютор бағасын тек тіркеу сәтінде ұсынатын болса, енді әр екі жыл сайын баға саясатын қайта тіркеу міндеттелмек. Бұл ретте, ескі баға бойынша тіркелген дәрі-дәрмектер арзандауы мүмкін деген болжам бар.
Сондай-ақ Жандос Әділхан биылғы жылдан бастап қосымша құн салығының артуы дәрі бағасына қалай әсер ететініне де тоқталды.
— Денсаулық сақтау саласында қосымша құн салығына қатысты арнайы жұмыс тобы құрылды. Оның құрамына Мәжіліс депутаттары мен бизнес өкілдері кірген. Дәрі-дәрмекке ҚҚС қосудың бағалардың өсіміне әкелетінін ескере отырып, бұл қағидаттан бас тарттық, — деді ол.
Фото: BAQ.KZ
