Мал төлдету науқаны малшы үшін аса жауапты кезең. Бұл тек төрт түлік ұстағандарға ғана емес, жалпы ауылшаруашылығы саласы үшін маңызы зор науқан. Осыған орай Кербұлақ ауданындағы мал төлдету жұмыстарын жазуды жөн көрдік.
Кербұлақ ауданы, Басши ауылының тұрғыны Қанат Қанапияұлы бірнеше жылдан бері жеке шаруашылықпен айналысып келеді. Оның иелігінде 300-ге жуық қой бар. Қойларды көктемгі төлдетуге дайындау қыстың басынан басталды. Қанат Қанапияұлының айтуынша, төлдің аман-есен туып, ширауы үшін бірнеше маңызды шараны орындау қажет. Қойлар қыстан күйлі шығуы үшін құнарлы жемшөппен қамтамасыз етіледі. Мал денсаулығы тексеріліп, қажетті екпе салынып, дәрумендер беріледі. Буаз қойлар бөлек қамалып, олардың жағдайы ерекше бақылауға алынады. Арнайы жылы қоралар дайындалып, төлдің суықтан қорғалуы қамтамасыз етіледі.
– Мен 2004 жылдан бері жеке шаруашылықпен айналысамын. Бұл кәсіпті бастағанда қолымда 50-ге жуық қана қой болды. Еңбек пен дұрыс күтімнің арқасында мал басын көбейттім. Көктем – біз үшін ең жауапты кезең. Себебі төл алу – шаруашылықтың болашағы. Биыл 250-320 қозы алуды жоспарлап отырмын. Бұл оңай жұмыс емес, оған қыстан бастап дайындаламыз. Қойлар қоңды болуы үшін қыс бойы шөп, жем қорын жеткілікті мөлшерде дайындап, аналық малдың денсаулығын жақсылап күтеміз. Төлдеу кезінде әрбір қойдың жағдайын бақылап, жаңа туған қозылардың жетілуін қадағалаймыз. Әлсіз қозыларға ерекше күтім жасап, қажет болса қолдан сүт беріп өсіреміз. Көктемде туған қозылар тез жетіліп, жайылымға ерте үйренеді, – дейді Қанат Қанапияұлы.
Қанат Қанапияұлының тәжірибесі көрсеткендей, ерте туған қозылар табиғи шөппен қоректеніп, күзге дейін салмақ жинайды, бұл қыста шығынды азайтады. Оның еңбегі мен тәжірибесі мал шаруашылығының қаншалықты жауапты екенін көрсетеді.
Бауыржан ҚАСЫМХАН
