Бильярд үстелі, шарлар, ки (таяқша), борттар – барлығы дәлдікпен есептеліп жасалатын құралдар. Әр шардың салмағы, көлемі, үстелдің ұзындығы мен биіктігі ойынның сапасына тікелей әсер етеді. Бұл ойын жеңіл көрінгенімен, әр соққыда математикалық есеп, көз мөлшерінің дәлдігі мен стратегиялық ойлау қабілеті қажет. Сондықтан бильярд – тек ойын емес, нағыз тактикалық шайқас.
Бұл ойын түрінің пайдасы тек көңіл көтерумен шектелмейді. Ең алдымен, бұл ойын адамның ойлау қабілетін жақсартады. Әр қозғалысты есептеу, әр соққыны алдын ала болжау – логикалық ойлауды күшейтеді. Сонымен қатар, бильярд жүйке жүйесін тыныштандырып, сабыр мен зейінді арттырады. Көптеген психолог мамандар бильярдпен айналысуды күйзелісті жеңудің бір жолы ретінде ұсынады. Әсіресе жұмыстан шаршаған адам үшін бильярд ойнау — пайдалы әрі тынықтыратын іс.
Дене қозғалысын қажет етпейді деп ойлау — қате түсінік. Бильярд ойнау барысында адам үнемі еңкейіп, әртүрлі қалыпта тұрып, шарды көздеп, денесін теңгеріп отырады. Бұл – буындар мен бұлшықеттерге жеңіл жаттығу іспетті. Сонымен қатар, көздің жаттығуы мен қолдың дәлдігі де артады. Мұндай жаттығулар көздің көруін, дененің үйлесімділігін жақсартады. Сол себепті көптеген кәсіби бильярдшылар жаттығу кезінде спортшылар секілді режим ұстайды.
Тастаяқ – қарым-қатынас құралы. Көп жағдайда достар немесе әріптестер осы ойын үстінде емен-жарқын әңгіме құрып, бір-бірін жақын тани түседі. Бұл тұрғыдан алғанда, бильярд адамдар арасындағы байланыстарды нығайтатын, орта қалыптастыратын құралға айналған. Кейбір елдерде тіпті келіссөздер немесе іскерлік кездесулер бейресми жағдайда бильярд үстелінде өтеді. Мұндай ортада адамдар ашыла түсіп, еркін сөйлеседі.
Бүгінде бильярд – халықаралық деңгейде дамыған спорт түрі. Әлем чемпионаттары, түрлі кубоктар, кәсіби лигалар ұйымдастырылады. Қазақстанда да бильярдқа қызығушылық жоғары. Әсіресе, орыс бильярды ел ішінде кең тараған. Жергілікті спортшылар халықаралық жарыстарда жүлдегер атанып, ел намысын абыроймен қорғап жүр. Сонымен қатар, еліміздің көптеген аймақтарында бильярд клубтары, секциялары ашылып, жастарды тарту жұмыстары жүргізілуде. Бұл спорт түрінің дамуына қосылған үлес.
Қорыта айтқанда, бильярд – тек көңіл көтерудің ғана емес, жан мен тән саулығына, адамның зейіні мен тәртібіне ықпал ететін ерекше ойын. Ол адамның бойындағы шыдамдылықты, есепке бейімділікті, сабыр мен байсалдылықты дамытады. Әлемде миллиондаған адамды баурап алған бильярд – уақыттың өзі дәлелдеген, өмірдің түрлі саласына ықпалы бар мәдени және спорттық құндылық.
Мақпал Әділханқызы
