Қазақстан Республикасы Ішкі істер министрлігі 27 шілдеден бастап елімізде «Түнгі қаладағы балалар» атты жедел-алдын алу іс-шарасын жүргізуде. Polisia.kz хабарлауынша, бұл шара балалардың құқықтарын қорғау және жасөспірімдер арасындағы құқықбұзушылықтың алдын алу мақсатында ұйымдастырылған.
Профилактикалық рейдтің алғашқы күнінде полиция бөлімшелеріне 2000-нан астам жасөспірім жеткізілді. Олардың төртеуі қылмыс жасағаны, ал екі мыңға жуығы әкімшілік құқықбұзушылық жасағаны үшін ұсталған.
Сонымен қатар:
-
70 бала қараусыз жүрген жерінен анықталып, бейімдеу орталықтарына орналастырылды;
-
1700-ден астам бала түнгі уақытта көшеде және ойын-сауық орындарында болған, олар ата-аналарына тапсырылды;
-
48 кәсіпкер балалардың түнгі уақытта мекемеде болуына жол бергені үшін әкімшілік жауапкершілікке тартылды;
-
51 жасөспірім мас күйінде көшеде жүрген жерінен оқшауланды.
ІІМ Әкімшілік полиция комитетінің қызметкері Ботакөз Жалекешованың айтуынша, бұл жағдайлардың басым бөлігі уақытында тоқтатылмаса, қылмыстық оқиғаларға ұласуы мүмкін еді.
— Құрметті ата-аналар! Балаларыңыздың өмірі мен қауіпсіздігі үшін тікелей жауапты екендеріңізді еске саламыз. Бір күннің ішінде 220 ата-ана тәрбиелеу міндетін орындамағаны үшін әкімшілік жауапкершілікке тартылды. 116 жасөспірімнің мінез-құлқы дұрыс емес деп танылды, 139 ата-ананың бала тәрбиесімен айналыспайтыны анықталды, – деді Ботакөз Жалекешова.
Рейд барысында тоғыз тыйым салынған зат тәркіленді:
-
1 дана пневматикалық қару
-
5 пышақ
-
3 кастет
Бұл заттар дер кезінде тәркіленбеген жағдайда ауыр зардаптарға әкелуі мүмкін еді.
Сондай-ақ, балалардың психологиялық және ақпараттық қауіпсіздігін қамтамасыз ету үшін ІІМ 159 интернет-сайтты анықтап, оларды бұғаттауға бағытталған шаралар қабылдады.
Құқықбұзушылықтың алдын алу мақсатында 900-ден астам ақпараттық материал бұқаралық ақпарат құралдарында жарияланды.
— Жазғы демалыс кезінде балалардың қайда және кіммен жүргеніне ерекше назар аударуыңызды сұраймыз. Түнгі уақытта ересектердің қарауынсыз жүрген бала қылмыс құрбанына айналуы мүмкін. Сондықтан балаңызға қауіп төнген жағдайда не істеу керектігін түсіндіріңіз. Смартфонына «102» мобильді қосымшасын орнатып, полицияны шұғыл шақыру батырмасын пайдалана білуге үйретіңіз, – деп ескертті ІІМ өкілі.
Министрлік ішкі істер органдарының басым бағыттарының бірі балалардың қауіпсіздігін қамтамасыз ету екенін мәлімдеді.
