Бүгінгі таңда ауыл шаруашылығы – ел экономикасының маңызды тірегінің бірі. Ел ырысы – жерден. Сондықтан да егін еккеннің еңсесі биік, мал баққанның мерейі үстем.
«Нұртөле» шаруашылығында 170 гектар суармалы егістік, 250 гектар тәлімі егістік және 800 гектар жайылым жер бар. Шаруалардың ынтасын арттыру үшін шаруашылық басшысы Абай Төлебаев техникаларды заман талабына сай жаңартқан. Қазіргі таңда трактор, қызылша жинайтын комбайн, жапырақ шапқыш, қант қызылшасының тұқымы мен дәнді дақыл сепкіш, дәнді-дақыл картоп жинайтын комбайн, дәрі сепкіш және жүк көлігі де бар.
2024 жылы «Тәтті түбір» бағдарламасы аясында қант қызылшасына қажетті техникалар толық алынған. Шаруашылық биыл 30 гектарға картоп, 70 гектар жерге қант қызылшасын еккен. 50 гектарға майбұршақ, 30 гектарға жоңышқа сепкен. Таудағы тәлімі егістіктің 110 гектары бидай, 50 гектары арпа. Бүгінде жоңышқа жинап, қыс мезгіліне қамдануға кіріскен.
Өнімі мол шаруашылықта заманауи техникалар, тамшылатып суару жүйелері, тыңайтқышты тиімді пайдалану әдістері кеңінен қолданылады.
– Қасиетті Жер-ана еңбек еткен адамды нәсіпсіз қалдырмайды. Біз заман талабына сай техникаларды барынша жаңартып отырамыз. Жаңа технологияларды пайдаланып, мол өнім алудың жолын қарастырып келеміз. Алдағы уақытта жердің топырағын сараптамадан өткізіп, оның құнарлығын анықтап, минералды тыңайтқыштарды тиімді пайдалану қажеттігін де назарға алып отырмыз. Қазіргі таңда 20 адамды тұрақты жұмыспен қамтып келеміз. Егін егу және жинау кезіндегі маусымдық жұмысқа 60 жұмысшы аламыз. Жұмысшыларға көмек ретінде жемшөп, картоп өнімдерін нарық бағасынан 25-30% төмен береміз. Шаруашылықтың тасы өрге домаласа ең бірінші осы адал еңбеккерлердің ала жаздай бел жазбай төккен маңдай терінің арқасы. Маусымдық уақытша жұмысшыларға орта жалақылары 250-300 мың теңге төлейміз. Алдағы уақытта жұмысшыларға жұмыс барысын жеңілдету, яғни техникалармен жабдықтау, түскі астарын шаруа қожалығының есебінен қамтамасыз етуді жоспарлап отырмыз, – дейді шаруашылықтың жұмысын реттеп жүрген Абылай Абайұлы.
Жұмысшылардың жағдайы жасалып, олардың еңбегі лайықты бағалануда. Өнімділікті арттыру үшін мемлекет тарапынан да субсидиялар мен қолдау бағдарламалары жүзеге асырылып келеді. Бұл – шаруалардың ынтасын арттырып, ауыл өмірінің көркеюіне, мол өнім алуға жол ашуда.
Шаруа қожалығы құрылғалы бері мұнда білікті, өз ісінің нағыз мамандары еңбек етеді. Тракторшылар Құрманғали Мамырбаевтың, Бекен Бектемісовтың, Есей Қарғабаевтың, ағайынды Дәурен, Мұқан Төлебаевтардың есімдерін ерекше атап өтуге болады. Олар туған жердің топырағынан нәр алып, ауыл шаруашылық саласының дамуына зор үлес қосып жүрген еңбек адамдары. Әсіресе, зейнеткер атанса да шаруашылық жұмысынан қол үзбеген 65 жастағы Құманғали Мамырбаевтың еңбегі ерен.
– Ауылда береке бар. Еңбек еткен адам қашан да табысқа жетеді. Өз басым 1982 жылдан бері тракторды тізгіндеп келемін. Зейнеткерлікке шықсам да қол қусырып бос отыра алмадым. Елге пайдам тисін деп көк тракторыма қайта жайғастым. Ауыр әрі жауапты жұмыстың артында қамбаның молшылығы, елдің тоқшылығы тұр. Ең бастысы – заман тыныш болсын,– дейді еңбек адамы.
«Еңбек бәрін жеңбек» демекші, еңбек етіп, мақсатқа жеткен жанның шаруасы шалқып, несібесі артатыны белгілі. Талай қиындықтан өтіп, адал еңбегінің ақ майын татып отырған «Нұртөле» шаруа қожалығының жұмысы көпшілікке үлгі етуге тұрарлық.
