Панфилов ауданы аумағындағы облыстық маңызы бар автожолды күрделі жөндеу жұмыстарына Т3,1 млрд астам қаражат жұмсалмақ.
Жол жөндеу жұмыстарына тапсырыс беруші – «Жетісу облысының жолаушылар көлігі және автомобиль жолдары басқармасы» ММ. Жоспар бойынша, Өзбекстан Республикасының шекарасынан (Ташкент бағыты) бастап Шымкент – Тараз – Алматы – Қорғас бағыты арқылы Көкпек – Көктал – Благовещенск және Қырғызстан Республикасының шекарасына дейінгі жолдың 0-12,29 шақырым аралығы жөндеуден өтеді.
Мемлекеттік сатып алу порталында жарияланған ақпаратқа сәйкес, конкурстық өтінімдерді қабылдау 3 сәуірде басталып, 8 сәуірге дейін жалғасады.
Жеңімпаз анықталғаннан кейін келісімшарт жасалып, мердігер бес жұмыс күні ішінде орындалатын жұмыстардың түрі, көлемі және мерзімі көрсетілген жұмыс кестесін тапсырыс берушіге ұсынуға міндетті. Сонымен қатар, келісімшарт күшіне енгеннен кейін отыз күн ішінде жөндеу жұмыстарына қажетті техника мен жабдықтар объектіге жеткізіліп, бұл туралы тапсырыс берушіге хабарлануы тиіс.
Фото: dzen.ru
