Әрбір мемлекеттің басты құжаты болады. Ғасырлар бойы азаттықты аңсап, дербес мемлекет болуды қалаған халқымыз үшін 1995 жылы 30 тамызда қабылданған Конституцияның орны ерекше. Өйткені оның бойында ақ жаулықты ананың арман-тілегі, ақ сақалды қарияның ақ батасы бар.
Жалпы 9 тарау, 99 баптан тұратын Конституция 30 жылдың ішінде көптеген өзгертулер мен толықтыруларды бастан өткерді. Дегенмен, бастапқы ұстанымынан еш айныған емес. Керісінше, толықтырылып, өзгертіліп, азаматтарға артар міндеті мен жауапкершілігі нығайды.
Еліміздің басты байлығы адам екені, адаммен ғана мемлекеттің іргесі бекіп, келешегі кемелдене түсетіні 1-баптың 1-тармағында анық жазылған. Онда: «Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады, оның ең қымбат қазынасы – адам және адамның өмірі, құқықтары мен бостандықтары» деп тайға таңба басқандай көрсетілген. Яғни, еліміздегі әрбір жанның мемлекет үшін орны ерекше. Мейлі, ол басшы болсын, жұмысшы не мүгедек болсын, мемлекет өз қорғауына алып, қажетті қолдауды көрсететіні ашық айтылған. Тіпті, елдің ынтымағын бұзған қылмыскер мен лаңкестің өзі қамауға алынғанның өзінде лайықты жазасын алып, сот белгілеген мерзімді мойнымен көтеруге міндеттелетінін түсінуге болады. Ал, орта білім алу баршаға ортақ екенін салынып жатқан балабақшалар мен мектептер айғақтайды. Осы тұрғыдан алғанда Ұлы Далада Көк байрақ көтерген мемлекеттің азаматтары шүкір етуді естен шығарып жатады. Мысалы, бір кеңістікте жатқан кейбір мемлекеттер азаматтарын толығымен орта мектептің білімін алуға жүктей алмайды. Кеңестік кезеңнен қалыптасқан қазақстандық білім жүйесі өзгелерге үлгі екенін жиі айтатынымыз шынында қуанарлық жағдай.
Жаратқан Алла Тағала қазақ деген халықтың абырой, беделін, кескін-келбетін өзге елдердің алдында ертедегі ата-бабаларымыздың ақ білектің күшімен, ақ найзаның ұшымен жерді қорғай жүріп жасаған дұға-тілектері арқылы асқақтатты. Себебі, әрбір өскіннің санасына нұр құйып, саңылау салған ұлттық ертегілердің бәрі де қой үстіне бозторғай жұмыртқалаған мамыражай заманның орнауымен аяқталады. Осынау, түйіннің өзі асқақ арманнан, асыл мұраттан хабар берсе керек.
Қоғамдық татулық пен саяси тұрақтылықты, бүкіл халықтың игілігін көздейтін экономикалық дамуды, қазақстандық патриотизмді, мемлекет өмірінің аса маңызды мәселелерін демократиялық әдістермен, оның ішінде республикалық референдумда немесе Парламентте дауыс беру арқылы шешу басты ұстаным екені айтылған 1-баптың 2-тармағына қарап еліміздің ұстанған бағытына сүйсінуге болады. Шынында қоғамдағы ынтымақ пен береке, саяси тұрақтылық дамудың басты тетігіне жататынын байқап, біліп жүрміз. Соңғы 5 жылдың ішінде күллі әлем халқын алаңдатқан «COVID-19» вирусы, «Қаралы қаңтар» оқиғасы орын алып, көп нәрсені басқаша бағалай бастадық. Бейбітшілік пен тыныштықтың құны қымбат екенін ұғындық.
Ендеше, еліміздің басты құжаты – Конституция ұсынған жолмен жүріп, ондағы шарттар мен ережелерді берік ұстану өте қажет. Пенде шіркін нәтиженің жылдам келіп, табыстың молынан болғанын қалайды. Алайда көп нәрсенің өзгеруі мен қалпына келуі үшін уақыт пен шыдам керек екен. Қазақтың: «Батпандап кірген ауру мысқалдап шығады» дейтіні осы болса керек.
Мәди АЛЖАНБАЙ
