Шахмат ойнайтындардың шеберлігін шыңдау мақсатында барлық деңгейдегі мәслихат депутаттары, ардагерлер мен БАҚ өкілдері, қоғам белсенділері, мемлекеттік қызметкерлер арасында Сенат Төрағасы Мәулен ӘШІМБАЕВТЫҢ қолдауымен биыл екінші мәрте «SENAT OPEN» кубогы ұйымдастырылып жатыр.
Өңірлерде іріктеу өтіп, одан үздік шыққандары аймақтық жарысқа жолдама алған. Алматы қаласы, Алматы облысы, Шығыс Қазақстан облысы және Жетісу облысының електен өткен шахматшыларының басын қосқан «Шығыс» аймақтық лигасы Талдықорғанда өтті. Көзге түсіп, жақсы нәтиже көрсеткендер 29 тамызда Астанада болатын финалға қатысады.
Жетісудағы жарысқа төрт облыстан 150-ге жуық адам қатысты. Жалпы көшбасшылардың зияткерлік сайысы 9 турдан, швейцариялық жүйе бойынша 10+5 уақыт бақылауымен өтті. Ашылу салтанатында облыс әкімінің орынбасары Диас Есдәулетов қатысушыларға сәттілік тілеп, артынша еңбегі көрінген азаматтарды ел алдында марапаттады. Атап айтсақ, Қазақстан шахмат федерациясы президиумының шешімімен «Үлес» медалін Үштөбе қаласының жасөспірімдер спорт мектебінің аға жаттықтырушысы Александр Тюляндин және Жетісу облысының аға жаттықтырушысы Мубашир Қалдыбаев алды.
Турнирдің ауқымы кеңейіп, қатысушылар саны да артып келеді. Мәселен, былтыр алғаш ұйымдастырылғанда жалпы екі мың шахматшы қатысса, биыл өңірлердегі іріктеудің өзіне жалпы үш мың адам тіркелді. Төрт облыстың үздіктері тоғысқан «Шығыс» аймақтық лигасының нәтижесі бойынша ардагерлер арасында Берік Тілеуімбетов (Алматы қаласы), БАҚ өкілдері арасында Ақәділ Дүйсенбаев (Алматы қаласы), депутаттар арасында Еркенбек Рақышев (Алматы қаласы), қоғамдық кеңес мүшелері арасында Дмитрий Фатьянов (Жетісу облысы), мемлекеттік қызметкерлер арасында Дәурен Исаев (Алматы) және әйелдер арасында Гүлзада Бердешева (Жетісу облысы) жеңімпаз атанды. Тұғырдың жоғарғысына орналасқандардан бөлек, елордадағы финалдық кезеңге жалпы 38 қатысушы іріктелді. Олардың ішінде облысымыздан 9 шахматшы бар.
Серік ҚАНТАЙ
