Алаяқтардың құрбаны болып, баспанасынан айырылып қала жаздаған профессор Кәкен Қамзин көпшіліктің көмегімен үйін қайтара алатын болды, деп хабарлайды 7-su.kz ақпарттық порталы.
Профессор әлеуметтік желідегі парақшасында сүйінші жаңалықпен бөлісті. Оның айтуынша, шілде айының басынан бері баспанасын қайтару үшін ел-жұрттан қаржылай қолдау сұрауға мәжбүр болған. Нәтижесінде жиналған сома 9,5 миллион теңгеден асқан.
«Аллаға мың да бір шүкір, бүгін сол ‘жылу’ жинауды ресми түрде тоқтататынымды қуана хабарлаймын. Жиналған қаражат 9 529 836 теңгеге жетті», – деп жазды ол.
Алайда үйді қайтарып алу үшін әлі де ірі сома қажет болған. Сол кезде аты-жөнін жарияламауды өтінген бір қайырымды азамат жетпей тұрған 23 миллион теңгені қолма-қол әкеліп берген.
«Бұл тек қаржылай көмек қана емес, сенімнің, бірліктің, мейірімнің нағыз көрінісі», – деді Қамзин.
Енді профессор сатып алушы отбасыға толық қаржысын қайтарып, баспанасын өз атына қайта рәсімдейді.
