Бас прокурор Берік Асылов еліміз бойынша жүздеген ауыл өз еркімен спиртті ішімдіктерді сатудан бас тартып жатқанын айтты.
Оның сөзінше, бұл — қарапайым халықтың саналы таңдауы.
«Тәртіп, денсаулық және балаларының болашағы үшін жасалған шешім. Мәселен, Маңғыстау облысының Маңғыстау ауданындағы бір ауылда тұрғындар ішімдікті сатудан өз еркімен бас тартып, бұл туралы бейнероликті әлеуметтік желілерде жариялады. Осындай мысалдар Ақмола, Жамбыл, Қарағанды, Атырау және басқа да облыстарда кездеседі.
Иә, бұл елдегі барлық ауыл санын ескерсек, теңізге тамған тамшыдай көрінуі мүмкін. Бірақ бастысы жағдайдың оң серпіні бар», — дейді Асылов.
Бас прокурор мұндай елді мекендер саны артып келе жатқанын да жеткізді.
«Адамдар сенім мен тұрақтылықты, тыныштықты жоғары бағалап, бір-біріне үлгі бола бастады. Бастама ауыл ақсақалдары мен Қоғамдық кеңестерден шығып, прокуратура, полиция және жергілікті әкімдіктердің тарапынан үйлестіру, алдын алу және қауіпсіздік қамтамасыз етілді. Ауыл кәсіпкерлері ерекше алғысқа лайық. Жерлестерінің үнін естіп, олар дүкен сөрелерінен ішімдікті өз еркімен алып тастады. Күмәнданғанмен, табыстары азайған жоқ. Керісінше, ауыл тұрғындары ішімдіктің орнына балаларға пайдалы азық-түліктерді жиі сатып ала бастады», — деді ол.
Берік Асылов нәтиже көңіл қуантатынын жеткізді. Оның сөзінше, кейбір ауылдарда қылмыс мүлде жойылған, тұрмыстық жанжалдар тоқтаған, жастар спорт пен саналы өмір салтын таңдай бастаған.
Айта кетейік, ресми статистика бойынша биылғы жылдың алғашқы үш айында алкогольге мас күйде жасалған қылмыстар саны азайған.
Дереккөз, коллаж: Dalanews.kz
