Қазақстанда теміржол саласын дамыту мақсатында бес жаңа ірі жоба бойынша құрылыс жұмыстары жүргізілуде. Бұл туралы Үкімет отырысында Көлік министрі Нұрлан Сауранбаев мәлімдеді.
Министрдің айтуынша, «Достық – Мойынты», «Алматы айналма теміржолы», «Дарбаза – Мақтаарал», «Мойынты – Қызылжар» және «Бақты – Аягөз» бағыттарында теміржол желілері салынуда. Биыл жоспарланған мерзімінен бұрын екі маңызды жоба – «Достық – Мойынты» учаскесі мен Алматы айналма теміржолы пайдалануға беріледі.
2026 жылы тағы екі жаңа бағыт — «Мойынты – Қызылжар» және «Дарбаза – Мақтаарал» іске қосылады деп жоспарланып отыр.
Сонымен қатар жыл басынан бері жалпы ұзындығы 3 мың шақырым болатын теміржол желісін жаңғырту жұмыстары басталған. Бұл көрсеткіш жаңа жол салумен тең. Жаңарту нәтижесінде «Қызылжар – Сексеуіл» учаскесінің өткізу қабілеті 8 пойыздан 25 пойызға дейін, ал «Қандыағаш – Тобыл» бағыты бойынша 7 пойыздан 25 пойызға дейін артады.
