Иордания Хашимит Корольдігінің Королі ІІ Абдалла Қазақстан Президенті Қасым-Жомарт Тоқаевқа елдің ең жоғары наградаларының бірі – «Әл-Нахда» орденін табыс етті, деп хабарлайды 7-su.kz ақпараттық порталы.
Король марапаттау барысында Мемлекет басшысының Қазақстан мен Иордания арасындағы достық пен ынтымақтастықты нығайтуға қосқан елеулі үлесін атап өтті.
Президент Тоқаев ІІ Абдалла бен әл-Хусейнге және бауырлас иордан халқына алғыс білдіріп, бұл марапатты екі ел арасындағы өзара сенім мен достықтың символы ретінде қабылдайтынын жеткізді.
– Ұлы Мәртебелі, Сізді аса көрнекті мемлекет қайраткері әрі көшбасшы ретінде бағалаймын. Сондықтан бұл марапатты Өзіңізге деген шынайы құрметпен қабыл аламын. Осы айтулы оқиғаны Қазақстан Республикасы мен Иордан Хашимит Корольдігінің арасындағы өзара сенімге негізделген ынтымақтастықтың символы санаймын. Біз ықпалдастығымыздың жаңа көкжиегі белгіленген бүгінгі келіссөздердің қорытындысына баса мән береміз. Осынау маңызды сапардың нәтижесі серіктестікті одан әрі нығайтуға тың серпін береді деп сенемін. Елдеріміз арасындағы конструктивті диалог пен тығыз қарым-қатынас алдағы уақытта да кеңейе бермек. Бұл жаңа бағыттарды қамтып, екіжақты әріптестіктің дамуына ғана емес, өңірлік және жаһандық тұрақтылыққа да ықпал етеді деп ойлаймын, – деді Президент.
