Облыстық мәслихат депутаттарының кезекті ХХVI сессиясы өтіп, онда бірқатар мәселе қаралды. Облыс әкімінің орынбасары Диас ЕСДӘУЛЕТОВ қатысқан жиынды мәслихат хатшысы Гүлнар ТОЙЛЫБАЕВА ашып, жүргізді.
Күн тәртібіндегі мәселелер бойынша баяндама жасаған басқарма басшылары атқарылған жұмыстарды мәлім етті. Облыс аумағында су тасқыны жағдайы тұрақты және үздіксіз бақылауда екенін тілге тиек еткен облыстық ТЖД басшысы Н. Бекбосынов биыл да су тасқынына қатысты жұмыстар қолға алынғанын атап өтті.
«Облыс бойынша 57 гидробекет жұмыс істеп тұр. Төтенше жағдайлардың алдын алу жұмысы қатаң бақылауда», – деген ол өрт қауіпсіздігі бойынша жүргізілген жұмыстарды тілге тиек етті.
Күн тәртібінде қаралған Жетісу облысының өңірлік нышанын бекіту туралы мәлім еткен облыс әкімінің орынбасары Диас Рахметұлы:
– Өздеріңізге белгілі, 2022 жылы өңірлік нышанды белгілеу бойынша қажетті конкурстық процедуралар атқарылып, 17 авторлық жұмыстардың ішінен Есет Дәуренбаевтың эскизі комиссия шешімімен таңдалды. Өңірлік нышанға 2022 жылы 17 қазанда Мемлекеттік рәміздер мен геральдикалық белгілер жөніндегі сараптама кеңесінің оң қорытындысы беріліп, облыстық мәслихаттың отырысында таныстырылып, келісілген болатын.Осыған орай Жетісу облысының өңірлік нышанын бекітіп берулеріңізді сұраймын, – деді.
Жетісу облысын газдандыру бағдарламасын іске асыру туралы баяндама жасаған Жетісу облысының энергетика және ТҮКШ басқармасының басшысы А. Бекетаевтың сөзінше, облысты кешенді газдандыру схемасына сәйкес 358 елді мекеннің 192-і газдандыруға жатады. Аймақты газдандыру деңгейі бүгінгі таңда 56,5 пайызды құрап отыр. Жалпы 63 елді мекен газдандырылып, 392,6 мың адам көгілдір отынға қол жеткізді.
«Мемлекет басшысының тапсырмасына байланысты биыл 63 елді мекенді газдандыру қажет. Одан бөлек, 45 жобаны іске асыруға бюджеттен 7,9 млрд. теңге бөлінді», – деген басқарма басшысы газдандырудың екінші кезеңі бойынша атқарылған жұмыстарды да баян етті.
Сессияда көтерілген мәселелерге қатысты депутаттар бірауыздан дауыс берді. Мәслихат жиыны «Депутаттық сағат» отырысымен аяқталды.
Сарби ӘЙТЕНОВА
