Президент Қасым-Жомарт Тоқаев Қытай ұлттық ядролық өнеркәсіп корпорациясының (CNNC) бас директоры Шэнь Яньфэнді қабылдады, 7-su.kz ақпараттық порталы.
Мемлекет басшысы қонақты Қытай атом өнеркәсібінің 70 жылдық мерейтойымен құттықтап, бұл дата екіжақты әріптестікті жаңа деңгейге көтеруге жол ашатынын атап өтті.
Президенттің айтуынша, Қазақстан мен Қытай арасындағы стратегиялық серіктестіктің маңызды бағыты – атом энергетикасы. Тоқаев ҚХР Төрағасы Си Цзиньпинмен жүргізілген келіссөздер барысында атом индустриясында бірқатар нақты уағдаластықтарға қол жеткізілгенін жеткізді.
Қасым-Жомарт Тоқаев тәжірибесі мол және технологиялық әлеуеті жоғары CNNC компаниясымен бірлескен жобалардың, оның ішінде Қазақстан аумағында екінші атом электр стансасын салу ісінің табысты жүзеге асырылатынына сенім білдірді.
Шэнь Яньфэн өз кезегінде Қазақстанмен әріптестікке ерекше мән беретінін айтып, екі ел арасындағы атом энергетикасы саласындағы ынтымақтастықты дамытуға дайын екенін жеткізді.
