Жетісу облысында жастардың есірткіге қарсы санасын қалыптастыру және құқыққа қайшы жарнамаларды жою мақсатында кең ауқымды «Қауіпсіз орта – жарқын болашақ!» атты антинаркотикалық граффити-акция ұйымдастырылды.
Аталған шараның негізгі мақсаты – жастарды зиянды ақпарат көздерінен қорғау, көпқабатты тұрғын үйлер мен қоғамдық нысандарда жазылған заңсыз граффити, кодтар және есірткі насихатына тосқауыл қою, сондай-ақ қоғам арасында салауатты өмір салтын насихаттау болды.
Акция аясында төмендегідей жұмыстар атқарылды:
• Қала аумағындағы ғимараттар мен қоғамдық орындарда жазылған, есірткіні насихаттайтын заңсыз жарнамалар мен шифрланған сілтемелер (QR-кодтар, Telegram арна атаулары және т.б.) анықталып, дереу жойылды;
• Оның орнына «ЕСІРТКІГЕ ЖОЛ ЖОҚ!» деген секілді антинаркотикалық ұрандар мен мотивациялық сөздер жазылды;
• Жастар мен тұрғындарға есірткінің құқықтық және әлеуметтік зардаптары түсіндірілді;
• Оқушылар мен студенттерге арналған құқықтық, психологиялық, медициналық кеңестер берілді.
Арнайы түсіндірме жұмысын Жетісу облыстық Полиция департаментінің Есірткі қылмысына қарсы іс-қимыл басқармасының қызметкері, полиция майоры Дастан Маликжанович Мырзақұлов жүргізді. Ол жастарға есірткінің зияны, қауіпсіз орта қалыптастыру жолдары және құқық бұзушылықтың алдын алу бойынша кеңестер берді.
Шараға ерікті жастар тобы, оқушылар мен студенттер, құқық қорғау органдарының өкілдері, педагогтер мен қоғам белсенділері белсенді қатысты.
Акция барысында түсірілген суреттер мен бейнематериалдар әлеуметтік желілерде кеңінен таратылып, «Қауіпсіз орта – жарқын болашақ!» үндеуі жастар арасында кең қолдау тапты.
Ұйымдастырушылар:
• Жетісу облысының қоғамдық даму басқармасы
• Жетісу облыстық Полиция департаменті
• «Саналы қоғам» қоғамдық қоры
Жоба: «Есірткісіз таза қоғам»
Бұл акция жоғарыда аталған «Саналы қоғам» қоғамдық қоры жүзеге асырып жатқан «Есірткісіз таза қоғам» әлеуметтік жобасы аясында өтті. Жоба Жетісу облысы аумағында жастар арасында есірткі қолданудың алдын алуға, қауіпсіз орта құруға және құқықтық сауаттылықты арттыруға бағытталған.
Қауіпсіз орта – бәріміздің жауапкершілігіміз. Бірігіп әрекет етсек – болашағымыз жарқын болмақ!
Данияр Мамыш
«САНАЛЫ ҚОҒАМ» қоғамдық қоры
