Ежелден бағбандықты байырғы кәсібі еткен жаркенттіктер көктемде бау-бақшасына жеміс көшеттерін отырғызуды әдетке айналдырған.
Бұл уақытта қала базары әр тараптан әкелінген жеміс ағаштарының жас көшеттеріне толып кетеді. Олардың бағасы, түрі, сұрыптары әралуан. Десек те бағасы қолжетімді. Осындай ұтымды бизнес жергілікті бапкер бағбандардың жерсіндірілген, халыққа таныс жеміс көшеттерін өсіруге құлшынысын арттырды. Қазір аудандағы бірнеше қожалық басқа шаруасымен қатар жеміс көшеттерін байлау арқылы теліту немесе қаламша арқылы будандастыру әдістерімен өсіріп, күз бен көктемде тұрғындарға сатуды кәсіп етуде.
Солардың қатарында Үлкеншыған округіндегі «Ахметов», Мәулен Кәрібаев, Ярмухамед Машуров, жаркенттік «Сайрамбеков», Пенжім округіне қарасты Ават ауылындағы Қайрат Аширов қожалықтары жергілікті тұрғындарға жақсы таныс. Олардың бәрі жеміс-жидек көшеттерінің жерсіндірілген сорттарын шығарудың қыр-сырын жетік меңгерумен қатар өздері алма, өрік, шабдалы, алмұрт, басқа да жеміс ағаштарының бағын жасап, жергілікті базарды отандық өнімдермен қамтамасыз етіп жүрген азаматтар.
Өңірде жалпы 5 мың гектарға жуық жерде жеміс-жидек бағы бар. Бұрынғы бақтардың бәрі тек алма сұрыптарын өсірсе, қазір басқа да жеміс түрлерін алқаптаған қожалықтар көбейді. Мысалы Ават ауылындағы Қайрат Аширов шабдалы өсіруді қолға алған. Ал Айдарлы ауылдық округіндегі «Жаркент- фрукт» ЖШС жеміс ағаштарының түрлерінен алдыңғы қатарда. Мұнда 10 жылға жуық уақыттан бері 578 гектар жерге ергежейлі алма сұрыптары, 405 гектарға будандастырылған түрік алшасы, 74 гектар шабдалы, 40 гектар алхоры және 13 гектар алқапқа алмұрт, жалпы 1110 гектар жерге жеміс ағаштарын өсіріп, тұрақты күтімнің нәтижесінде барлық жеміс ағаштары жыл сайын жайнап, жапырақ жайып, бұрынғы құлан иек құмды өңірге өң кіргізіп тұр.
Жеміс бағын өсіру өте күрделі іс. Мұндай шаруамен шұғылданатын адам бағбандық ғылымды жетік меңгерген арнайы білімі болуы керек. Дегенмен ежелден жеміс-жидектің отаны болған Жаркент өңірінде бақ баптауды кәсіп еткен азаматтар аз емес. Бағбандардың еңбегінің жемісін ел игілігіне айналдыру үшін өңірде ұқсатушы кәсіпорындар ашу күн тәртібіндегі мәселе.
Мырзағали НҰРСЕЙІТ
Панфилов ауданы
