Алматыдағы «Орталық» стадионда өткен Чемпиондар лигасының жалпы кезеңінің екінші турында «Қайрат» мадридтік «Реалдан» 0:5 есебімен жеңілді.
Франциялық жұлдыз Килиан Мбаппе хет-трик авторы атанды: ол 25-минутта пенальтиден есеп ашып, кейін 52 және 73-минуттарда тағы екі мәрте гол соқты. Сондай-ақ Эдуардо Камавинга (83) мен Браим Диас (90+3) бір-бірден гол соқты.
SofaScore бағалауынша, матчтың үздік ойыншысы – Мбаппе (9,6 балл). Одан кейінгі үздік нәтиже қорғаушы Дин Хейсенге (8,5) тиесілі. Ал мадридтіктер қатарында ең төмен баға алғандар: Винисиус Жуниор, Франко Мастантуоно, Фран Гарсия және Рауль Асенсио (барлығы – 6,7 балл).
«Қайрат» сапында ең жоғары баға Жоржиньоға (6,6) бұйырды. Дастан Сәтбаевтың ойыны 6,4 баллмен бағаланса, ең төмен көрсеткіш Луиш Матада (5,6). Ал 18 жастағы қақпашы Шерхан Калмурза 5,9 балл алды.
Алматылық клубтың Чемпиондар лигасының жалпы кезеңіндегі екінші жеңілісі. Бұған дейін «Қайрат» сырт алаңда «Спортингке» 1:4 есебімен есе жіберген болатын. Ал «Реал» қатарынан екінші рет жеңіске жетті: алғашқы турда «Марсельді» 2:1 есебімен ұтқан.
«Қайраттың» алдағы ойындары:
-
21 қазан: «Қайрат» – «Пафос» (21:45)
-
6 қараша: «Интер» – «Қайрат» (01:00)
-
26 қараша: «Копенгаген» – «Қайрат» (22:45)
-
9 желтоқсан: «Қайрат» – «Олимпиакос» (20:30)
-
20 қаңтар: «Қайрат» – «Брюгге» (20:30)
-
29 қаңтар: «Арсенал» – «Қайрат» (01:00)
