Экология және табиғи ресурстар министрі аңшылық нысаны саналатын бағалы жануарлардың тізіміне өзгерістер енгізу туралы жаңа бұйрыққа қол қойды. Жаңа құжатқа сәйкес, аңшылыққа рұқсат етілетін жануарлар саны көбейіп, тізімге 35 сүтқоректі мен 59 құс түрі енгізілді. Ал бұрынғы тізімде болған су жануарлары енді алынып тасталды. Бұл өзгерістер 2025 жылғы 20 қазаннан бастап күшіне енеді.
Сүтқоректілер тізімі:
Жаңартылған тізімге түлкі, қоңыр аю (Тянь-Шань аюынан басқа), бұлғын, құну, америкалық су күзені, сілеусін (Түркістан сілеусінінен басқа), қабан, марал, бұлан, сайғақ, сібір тау ешкісі, дала және орман қояндары, қасқыр және басқа да жабайы аңдар енгізілді.
Құстар тізімі:
Аңшылыққа рұқсат етілетін құстардың қатарына қызылтұмсық және қарамойнақ суқұйрық (гагара), қаз, көкқаз, сұр үйрек, шіл, құр, бөдене, кекілік, қырғауыл, тырнақ (дупель), үлкен және орта аққұмшық (кроншнеп) және өзге де су мен орман құстары кіреді.
Су жануарлары алынып тасталды:
Бұрын аңшылық пен балық аулауға рұқсат етілген 67 су жануарының түрі жаңа бұйрықтан шығарылды. Олардың арасында белуга, севрюга, орыс бекіресі, стерлядь, пелядь, шортан, ақ амур, сазан, дөңмаңдай, кәдімгі көксерке, камбала және кемпірқосақ алабұғасы бар.
Министрлік мәліметінше, бұл өзгерістердің басты мақсаты – жануарлар дүниесін сақтау және биологиялық әртүрлілікті қорғау. Бұйрық күшіне енгеннен кейін, Қазақстанда барлық аңшылық қызмет тек осы жаңартылған тізім бойынша жүзеге асырылады.
