Жәнібек Әлімханұлы (17-0, 12 КО) мен кубалық Эрисланди Лара (31-3-3, 19 КО) арасындағы титул біріктіретін жекпе-жегінің нақты күні белгіленді.
Бұл туралы 7-su.kz ақпарттық порталы Vesti.kz сайтына сілтеме жасап хабарлайды.
Инсайдер Дэн Рафаэльдің мәліметінше, жекпе-жек 6 желтоқсанда (Қазақстан уақытымен 7 желтоқсан күні таңертең) өтеді. Кездесу АҚШ-тың Техас штатындағы Сан-Антонио қаласында орналасқан Frost Bank Center аренасында ұйымдастырылады.
Орта салмақта өтетін бұл айқаста Жәнібек өзіндегі WBO және IBF белбеулеріне Ларадағы WBA титулын да қосып алуға тырысады. Бұл кездесу PBC PPV аясындағы бокс кешінің екінші басты оқиғасы болмақ.
Ал кештің басты жекпе-жегінде мексикалық Айзек Крус (28-3-1, 18 КО) пен америкалық кіші Ламонт Роуч (25-1-2, 10 КО) жұдырықтасады. Олар бірінші жартылай орта салмақта WBC ұйымының «уақытша» чемпионы атағы үшін айқасады.
Жәнібек кейінгі жекпе-жегін сәуір айында Астанада өткізген. Әлімханұлы ол кезде франциялық Анауэль Нгамиссенгені (14-1, 9 КО) бесінші раундта нокаутпен жеңген болатын.
Орта салмақтағы төртінші белбеу – WBC титулы доминиканалық Карлос Адаместе (24-1-1, 18 КО). «Жабайы айғыр» лақап атты Адамес бұған дейін Әлімханұлымен жекпе-жектен бас тартқанын айта кетейік.
