Жетісу облысында полиция қызметкерлері мен пробация қызметінің өкілдері екі жүзге жуық оқушымен ерекше форматтағы кездесу өткізді, – деп хабарлайды Polisia.kz.
Кездесудің басты мақсаты жасөспірімдерге заң бұзушылықтың артында тек жазалау емес, нақты адами тағдырлар мен ауыр өмірлік сабақтар жатқанын көрсету.
Сабақтың әсерлі өтуі үшін ұйымдастырушылар арнайы қонақтар шақырды кезінде қателікке бой алдырған, бүгінде пробациялық бақылауда жүрген үш жас жігіт. Олар өздерінің өмір жолын жасырмай, шынайы әңгімелеп берді: бір сәттік ойсыз шешімнің өмірді қалай түбегейлі өзгертіп жібергенін, сол қателіктің салдарынан қандай қиындықтарға тап болғандарын және бүгінде қоғам алдында түзелуге қалай тырысып жүргендерін ашық баяндады.
Бар болғаны 22 жастағы бұл жігіттер қорқытып алу қылмысы үшін сотталып, енді жаңа өмірге қадам басуда. Кездесуде олар қолындағы пробациялық білезіктерін де көрсетті бұл оларға өткеннің сабағын және әр таңдаудың жауапкершілігін күн сайын еске салып тұрады.
Жасөспірімдер заң бұзушылықтың салдары тек жаза емес екенін өз көздерімен көрді. Бұл үзілген жоспарлар, жоғалған мүмкіндіктер және қалыпты өмірге қайта оралудың ұзақ әрі ауыр жолы.
Іс-шара ұйымдастырушыларының айтуынша, осындай кездесулер жас буынға үлкен ой салады. Олар әр әрекеттің салдары бар екенін, тіпті ол әзіл не шытырман оқиға ретінде басталса да, заң алдындағы жауапкершіліктен құтылу мүмкін еместігін ұғындырады.
Мұндай профилактикалық кездесулер жасөспірімдердің бойында заңға құрметпен қарау мәдениетін қалыптастырып, бір нақты ұстанымды бекітеді.
