Жетісу облысында полицейлер облыс тұрғынынан ақша бопсалаған күдіктіні қолға түсірді, деп хабарлайды 7-su.kz ақпарттық порталы.
Ұйымдасқан қылмыспен күрес басқармасының қызметкерлері жүргізген жедел-іздестіру іс-шараларының нәтижесінде Абай облысының тұрғыны ұсталды. Ер адам Жетісу облысының тұрғынын әлеуметтік желілерде интимдік мазмұндағы суреттер мен бейнематериалдарды жариялаймын деп қорқытып, 200 мың теңге талап еткен.
Жәбірленуші бірден полицияға жүгініп, құқық қорғау органдарының жедел әрекетінің арқасында күдікті қолға түсті.
Қазіргі уақытта ол қамауға алынып, тергеу амалдары жүргізілуде.
Қолданыстағы заңнамаға сәйкес, бопсалау әрекеті үшін төрт жылға дейін бас бостандығын шектеу немесе айыру жазасы қарастырылған.
Полиция азаматтарға мұндай жағдайларда қорқытулар мен бопсалауға көнбеуді, ал құқық бұзушылықтың құрбаны немесе куәгері болған жағдайда дереу полицияға хабарлауды ескертеді.
Тәртіп сақшыларының айтуынша, уақытылы қабылданған шаралар қылмыскерлердің әрекетін тоқтатып, өзге азаматтарды да осындай қауіптен қорғауға мүмкіндік береді.
