Жетісу облысының Көксу ауданында 17 жастағы бозбаланы іздеу шаралары екінші күн қатарынан жүргізіліп жатыр. Бұл туралы облыстық полиция департаменті хабарлады.
Полиция дерегінше, жасөспірім 8 қараша күні Бесқайнар ауылындағы үйінен шығып кеткен. Содан бері оның қайда екені белгісіз.
Жоғалған күні ол қара түсті қысқа күртеше, көк түсті қалпағы бар спорттық кофта, былғары аяқ киім киіп, өзімен бірге сөмке алып шыққан.
Қазіргі уақытта іздестіру жұмыстарына 50 полиция қызметкері, 30 мектеп мұғалімі, білім бөлімінің 16 қызметкері және 22 ерікті қатысып жатыр.
Іздеу шаралары бірнеше бағытта қатар жүргізілуде. Талдықорған қаласында «Арбат» пен «Кольцо» аудандары, сауда орталықтары, базарлар, мешіттер мен компьютерлік клубтар тексерілуде. Ал Бесқайнар ауылында елді мекеннің ішкі және шет аймақтары мұқият қаралып, іздеу парақшалары таратылған.
Сондай-ақ Балпық би ауылында «Балпық би – Алматы» бағытындағы такси қозғалыстары мен компьютерлік клубтар тексеріліп жатыр. Қоғамдық көліктер мен такси қызметтері де бақылауға алынған.
Полиция тұрғындардан жасөспірім туралы қандай да бір ақпарат болса, 112 нөміріне немесе жақын маңдағы полиция бөліміне хабарласуды сұрайды.
