Бұрын оңды-солды үлестірілген ауыл шаруашылығы жерлерінің өндірістік айналымға түспей тұрып қалған телімдер анықталып, оларды нағыз иесіне беру шаралары заңмен жасақталуда. Соңғы кезде бұл істер нақты нәтижесін көрсете бастады. Сөйтіп, ежелден еңбекке, жерге жақын ауыл адамдарына қайтарылған жерлерді әділдікпен қайта бөлу бір арнаға түсті. Бұл іс ауыл шаруашылығы өндірісін өркендеткен Жаркент өңіріне айтарлықтай оң әсерін тигізуде.
Биыл ауданда ауыл шаруашылығы мақсатындағы бұрын пайдаланылмаған жалпы аумағы 3237 гектар 29 жер учаскесі мемлекет меншігіне қайтарылды. Осы қайтарылған жерлерді шаруа қожалығын құру арқылы ауыл шаруашылығы өндірісін жүргізуге уақытша өтеулі жер пайдалану (жалға алу) құқығын беру жөнінде 5 мәрте бәсеке өткізіліп, жалпы ауданы 14246 гектар 148 жер учаскесі жер пайдаланушыларға берілді. Мұның сыртында инвестициялық жобаларды іске асыру мақсатында жалпы аумағы 261,6 гектар 3 жер учаскесі бар.
Айта кетейік, өңірде жерді қайта бөлудің өзіндік нақты талаптарын қалыптастырған аудан басшылары қайтарылған жерлерді алдымен сол жер учаскесі орналасқан округ тұрғындарына, онда да бұрын жер үлесі болмаған шаруаның алуына басымдық береді. Ол адам талаптанбаса, сол округтегі жер аумағын кеңітем деген қожалыққа мүмкіндік жасалады. Егер ол да талаптанбаса, көрші округтердің шаруаларына, басқа да талапкерлерге байқауда қолдау танытылады.
Мырзағали НҰРСЕЙІТ
