Күз түсіп, қыс басталар тұста өтетін турнир биыл да облыс әкімдігінің қолдауымен, дене шынықтыру және спорт басқармасының қадағалауымен, түрлі демеушілердің күшімен ұйымдастырылды. Келген командалар жүлдесіз қайтпады.Топтан шықпай жарысты ерте аяқтаған ұжымның өзі арнайы сый-сияпат алып, көңілі өсіп, мерейі тасыды.
Ашылу салтанатына арнайы қатысқан облыс әкімінің орынбасары Диас Есдәулетов Бейсен Құранбектің жұмысына қысқа-нұсқа тоқталып, оның есімі елі барда ұмытылмайтындығын айтты. Артынша жақындары, достары, әріптестері сөз алып, жарысты ұйымдастырушыларға алғыс білдірді.
Биылғы турнирге еліміздің әр өңірінен сегіз команда қатысып, екі топқа бөлініп, жеңімпазды анықтады. «А» тобынан «Атырау» мен «Шымкенттен» басым түскен «Қарекет» (Жетісу облысы) пен «Ақмешіт» (Қызылорда), ал «Б» тобынан «Алматы-Медиа» (Алматы қаласы) мен «Өскеменнен» (Шығыс Қазақстан облысы) ұпайы жоғары болған «Бекспорт» (Астана қаласы) пен «Сетанта» (Алматы қаласы) жартылай финалда ойнады. Жартылай финалдағы екі ойын да негізгі уақытта тең аяқталып, пенальти сериясына ұласты. «Қарекет» «Сетантамен» болған «лотереяда» жаңылса, «Ақмешіт» «Бекспортпен» болған тартысты пенальти сериясында сүрінді. Үшінші орын үшін болған кездесуде «Ақмешіт» «Қарекетті» ұтты, ал финалда «Сетанта» «Бекспортты» жеңді.
Құрылғанына көп болмаған, жарыстың дәмін енді татып жүрген «Сетантаның» бұл алғашқы тұғыр төріне көтерілуі. Оларға ұйымдастырушылар тарапынан миллион теңге берілді. Екінші орын алған «Бекспорт» командасы 700 мың теңге алса, үшінші орынға ие болған «Ақмешіт» 500 мың теңге және төрттікті түйіндеген «Қарекет» 200 мың теңгенің сертификатын иеленді. Одан бөлек, ойын өрнегімен көзге түсіп, үздік шыққандар арнайы номинацияларға ие болды.
– Біз алғаш рет турнирде чемпион болып отырмыз. Қуаныштымыз. Бұл тек бастамасы болсын. Ал жарыс жоғары деңгейде өтті. Талай әріптесімізді көріп, мәре-сәре болып жатырмыз. Барлығы Бейсен ағадан алыс адамдар емес, сондықтан да бұл турнир ыстық, – дейді «Сетанта» командасының ойыншысы, белгілі комментатор Руслан Бақытжан.
Биылғы турнирдің жөні бөлек. Себебі, эфирге шығып жүрген, материалдары газеттен, сайттан түспейтін, шығармашылықпен айналысатын қызметкерлер ғана қатысты. Алаңда 40 жастан асқан бір ойыншының жүруі міндеттелді. Тек қақпашы ғана техникалық жағына жауапты жандардан жасақталуына рұқсат берілді. Ұйымдастырушылар келер жылы да ерекше форматта өткізуді жоспарлап отыр.
Серік ҚАНТАЙ
