Президент Қасым-Жомарт Тоқаев ауыл шаруашылығы министрі Айдарбек Сапаровты қабылдады, – деп хабарлайды 7-su.kz ақпараттық порталы.
Кездесу барысында министр биылғы 10 айдағы аграрлық саланың даму қорытындылары туралы баяндады.
Министрдің айтуынша, өнім өндіру 8,2 триллион теңгеге жетіп, 5,4 пайызға артқан. Азық-түлік өндірісі 9 пайызға ұлғайып, 3,1 триллион теңге болды. Ал агросектор тауарларының экспорты 4,7 миллиард долларға дейін өсті.
Агроөнеркәсіп кешенін қолдау мақсатында соңғы екі жылда айналым қаражатын толықтыру және техника лизингі үшін 5 пайызбен тікелей несие беріле бастады. Президенттің тапсырмасымен саланы қаржыландыру 1 триллион теңгеге дейін ұлғайып, оның 250 миллиард теңгесі ауыл шаруашылығы техникасына жеңілдетілген лизингке бағытталды. Биыл 25 мыңнан аса техника сатып алынды. Машина-трактор паркі тозу көрсеткіші 90 пайыздан 70 пайызға дейін төмендеді.
Сондай-ақ, Мал шаруашылығын дамытудың кешенді жоспары қабылданады. Саланы цифрландыру аясында «е-АӨК» бірыңғай цифрлық экожүйесін құру жұмыстары жүргізілуде. Бұл платформа субсидиялау, жер қорын басқару, егін, мал және балық шаруашылықтарын, сондай-ақ мемлекеттік қызметтерді ортақ цифрлық арнаға біріктіреді.
Кездесу соңында Президент агроөнеркәсіп кешенін одан әрі дамыту және елдің азық-түлік қауіпсіздігін нығайту бойынша берілген тапсырмаларды сапалы орындау қажеттігіне назар аударды.
