Қасым-Жомарт Тоқаев Мемлекеттік кеңесші – Парламенттік реформа жөніндегі жұмыс тобының жетекшісі Ерлан Қаринді қабылдады, деп хабарлайды 7-su.kz ақпараттық порталы.
Кездесуде Президентке жұмыс тобы қызметінің аралық нәтижелері ұсынылды. Ерлан Қариннің айтуынша, e-Otinish платформасы мен Egov сервисінде «Парламенттік реформа» арнайы бөлімі іске қосылғалы бір ай ішінде азаматтар мен қоғам белсенділерінен 300-ге жуық ұсыныс түскен.
Сонымен бірге 6 саяси партия – Amanat, «Ауыл», «Ақ жол», Respublica, Қазақстан Халық партиясы және Жалпыұлттық социал-демократиялық партия – өз ұсыныстарын жолдаған. Ұсыныстарда бір палаталы парламенттің қызметі мен парламенттік партиялардың өкілеттігіне қатысты тетіктер қамтылған.
Жұмыс тобы мүшелері осы бағытқа арналған сарапшылық материалдар әзірлеген. Қазір барлық ұсыныстарды талдау және жүйелеу жұмыстары жүргізіліп жатыр. Екінші отырыс 2 желтоқсанда өтеді деп жоспарланған. Онда ұсыныстар жекелеген бағыттар бойынша жан-жақты қаралады.
Мемлекет басшысы алдағы парламенттік реформаның елдегі саяси жаңғырудың жаңа кезеңі болатынын атап өтті. Тоқаев барлық келіп түскен бастамаларды мұқият қарауды және олардың негізінде парламенттік жүйені жаңғырту бойынша нақты ұсынымдар дайындауды тапсырды.
