Журналист Кәмшат Тасболат соңғы уақытта ақпарат саласындағы қудалаулардың күшеюіне алаңдаушылығын білдірді. Оның айтуынша, журналистер мен блогерлердің бірінен соң бірі ұсталып, тергелуі – қоғамға жақсы белгі емес, – деп хабарлайды Todayinfo.kz ақпарат агенттігі.
Айтуынша, кезекті шу «әуежайды басып алды» деп айыпталған жас журналистен басталып, белгілі журналистің Әблязевтен сұхбат алғаны үшін сыналуымен жалғасқан.
«Баяғыда хабарлықтар каннибалдан да сұхбат алған. Онда тұрған не бар? Елді былықтырып кеткен адамға жұрт соншалық ереді деп ойлай ма?» – дейді ол.
Ол сондай-ақ қазақша сөйлеуді талап еткені үшін 4 жылға сотталған желтоқсаншы азаматтың ісін де «абсурд» деп атады.
«Сатиралық контент жасап жүрген жас бала не үшін тергелуі керек? Ал орыстілді журналист Ресейдің саясатын сынағаны үшін жауапқа тартылып жатыр. Бұл да жақсы нышан емес», – деді Тасболат.
Ауыл шаруашылығындағы проблемаларды көтерген блогердің де полицияға жиі шақырылуы қоғамдағы қысымды көрсетеді деп санайды. Оның айтуынша, шегірткеге қатысты жалған есепті әшкерелегені үшін блогердің қудалануы – ақпарат еркіндігінің дағдарысы.
«Халықтың көңіл-күйі онсыз да төмен. Қымбатшылық қысып барады. Осындай кезде сөз бостандығы үшін күресіп жүрген журналистер мен блогерлердің тіл үшін, әуежай үшін, тіпті шегіртке үшін сотталуы – нағыз нонсенс», – деді ол.
Кәмшат Тасболаттың сөзінше, егер журналистер тілді, экологиялық жағдайды, Ресейдің ақпараттық экспансиясын жазуға қорқатын болса, онда қоғамда қандай тақырыпты қозғауға болады?
Ол Мартин Нимеллердің әйгілі сөзін мысалға келтірді:
«Біреуді қуғындағанда үндемесең, ертең сені қорғайтын ешкім қалмайды».
«Біз соңғы 30 жылда оппозицияны қудалағанда үндемедік. Демократтарға, ұлтшылдарға тиіскенде үндемедік. Енді журналистерге жетті. Бірақ ертең олар сіздерге келгенде, арашалайтын ешкім қалмауы мүмкін», – деп жазды журналист.
Кәмшат Тасболат елге үміт сыйлайтын жақсы жаңалықтар қажет екенін айта келе, сөз бостандығын шектеуді доғару керегін атап өтті.
«Тәуелсіздіктің 35 жылдығында тіл үшін соттау – ұят. Ресейдің теріс саясатын сынағандарды қудалауды тоқтату керек. Кремльге жалтақтамай, ұлттық мемлекет құру жолында еңбек ететін уақыт келді», – деп қорытындылады ол.
