Жетісу облысында балалардың жол қауіпсіздігін арттыруға бағытталған ауқымды жұмыс жалғасуда. Polisia.kz мәліметінше, Текелі қаласында екінші ауысымда оқитын 2-6 сыныптың 2 500 оқушысы жарық шағылыстырғыш кеудешелермен толық қамтамасыз етілді.
Бұл бастаманы полиция қызметкерлері, ата-аналар, Текелі қалалық білім бөлімі және өңірлік білім басқармасы бірлесіп қолдады. Жарық қайтарғыш элементтері бар кеудешелер оқушылардың жолда алыстан көзге түсуіне мүмкіндік береді, әсіресе қараңғы уақытта және қолайсыз ауа райында олардың қауіпсіздігін едәуір күшейтеді.
Полиция өкілдерінің айтуынша, балалардың қауіпсіздігі – бір реттік акция емес, қоғамның барлық институттары бірігіп атқаратын жүйелі жұмыс. Жеткіншектерді жол-көлік оқиғаларынан қорғау – мемлекеттің басым міндеттерінің бірі.
Мемлекет басшысы Қасым-Жомарт Тоқаев та бірнеше рет балалардың қауіпсіздігін қамтамасыз ету – ұлттық деңгейдегі маңызды міндет екенін атап өткен.
Сонымен қатар, өңірдегі полиция қызметкерлері күн сайын мектептердің жанындағы жаяу жүргіншілер өткелдерінде кезекшілік атқарып, оқушылардың жолды қауіпсіз кесіп өтуіне көмектеседі. Мұндай тәжірибе балаларға ғана емес, қоғамға да жолдағы жас жаяу жүргіншілерге құрметпен қарау мәдениетін қалыптастыруға ықпал етеді.
Жетісу облысы балалардың қауіпсіздігін қамтамасыз етуді өзінің негізгі басымдықтарының бірі ретінде қарастырып отыр. Бұл бағыттағы жұмыстар алдағы уақытта да жалғасын табады.
