Мәжіліс депутаты Асхат Аймағамбетов қазақ баспасөзінің болашағына алаңдаушылық білдіріп, маңызды мәлімдеме жасады, – деп хабарлайды 7-su.kz ақпараттық порталы Alash.kz сайтына сілтеме жасап.
“БАҚ саласы қазір үлкен өзгерістерді бастан өткеріп жатыр: қағаз газеттер азайып, ақпарат легі негізінен электронды порталдарда өмір сүреді. Бұл – әлемдік үрдіс. Бірақ сонымен бірге бір мәселе бар: кез келген жаңалық порталы жұмысын тоқтатса, оның бүкіл архиві бірге жоғалуы мүмкін. Ал архивсіз – біз тарихтың бір бөлігін жоғалтамыз», – деді ол.
Аймағамбетов дәстүрлі баспасөзде ондаған жылдар бойы қалыптасқан жүйе бар екенін сөз етті. Яғни газеттер мен журналдардың даналары кітапханаларға тапсырылады, архивтеледі, сондықтан олар тарихи дерек ретінде сақталып қалады.
Ал электронды порталдардағы ақпарат та осылай жоғала берсе не болады? Бұл мәселені біз архив туралы заң жобасын талқылау кезінде көтердік. Халықаралық тәжірибе көрсеткендей, көптеген елдерде цифрлық басылымдарға арналған “legal deposit” тәрізді талаптар бар. Яғни цифрлық медиа өз жарияланымдарын ұлттық архивтерге тұрақты түрде тапсырып отырады. Біз де осы бағытта кәсіби қауымдастықпен бірге талқылап, баспасөздің қағаз нұсқаларына ұқсас жүйені яғни жаңалық порталдарының материалдарын архивке қабылдау мүмкіндігін қарастыруымыз керек, – деді депутат.
Мәжілісмен баршаға қолайлы, тиімді шешім табу маңызды екеніне ерекше тоқталды. Өйткені жаңалық порталы жабылғанда, жай ғана сайтты емес, ел тарихының бір бөлшегін жоғалту қауіпі туады.
