Ұлтымыздың ұлық мерекесі – Тәуелсіздік күні қарсаңында Жетісу облысының 8 ауданы мен 2 қаласындағы мәдениет мекемелеріне, облыстық архив, кітапхана, халық шығармашылығы орталығы және көркемсурет галереясына жаңа көліктер берілді.
Талдықорғандағы орталық алаңда өткен салтанатты шарада сөз алған облыс әкімінің орынбасары Диас Есдәулетов өңір басшысы Бейбіт Исабаевтың ізгі тілегін жеткізіп, жаңа автокөліктердің кілтін табыс етті.
Диас Рахметұлының айтуынша, бұл шара биыл екінші жыл қатарынан өткізілген «Жер жаннаты – Жетісу» облыстық телевизиялық байқауы аясында аймақтағы мәдениет саласының материалдық базасын нығайтуға бағытталған. Бүгінде өңірде 300-ден астам мәдениет және архив мекемелері бар. Осыған сай, Жетісу облысы құрылғаннан бері мәдениет саласының инфрақұрылымын жаңарту көрсеткіші 40 пайызға жуықтаса, бюджеті 83 пайызға өскен. Сондай-ақ соңғы үш жылда сала мекемелерінің материалдық базасын нығайтуға бюджеттен 1 млрд теңгеден астам қаражат бөлініп, оған музыкалық аспаптар, сахналық киімдер, компьютерлік жабдықтар және басқа да қажетті заттар сатып алынған.
– Өңірдегі мәдениет саласы қызметкерлері Жетісудың өнерін өрістетуге, халықтың рухани дамуына және сананы жаңғыртуға елеулі үлес қосып келеді. Сондықтан олардың алаңсыз жұмыс істеуіне жағдай жасау, мәдениет нысандарын материалдық-техникалық жағынан жүйелі түрде нығайту – біздің басты міндеттеріміздің бірі. Бүгін табысталған көліктер соның бір айғағы. Себебі өнер адамдары үнемі халық арасында, көптің алдында, әрдайым ізденісте болып, ел мен жерді аралайды. Сондықтан бұл көліктер мәдениет ұжымдарының гастрольдік және өзге де сапарларға шығуына, алаңсыз жұмыс атқаруына мол мүмкіндік береді. Келіп жеткен Тәуелсіздік мерекесі құтты болсын, көк туымыз тұғырлы болсын! – деді облыс әкімінің орынбасары.
Айдын КӘЛІМХАН
