Қара шаңырақтың киелі сахнасында сан саңлақ өнер көрсетті. Алыптар шоғыры да хас сұлудың көз жасындай мөлдір әлемнің шынайы кейіпкерлерін сомдады. Жарты ғасыр сүрдегінде өз шаңырағының өрендерін де таудай тұлғаға айналдырды. Жалпы жетісулықтардың маңдайына біткен Бикен Римова атындағы драма театры саңлақтарды сапына қосса, сол өнер майталмандары көпшілікке жаңа қойылым ұсынды.
Иә, күні кеше Қазақстанның Халық әртісі Дулыға Ақмолда, Қазақстанның еңбек сіңірген қайраткерлері Асылбек Боранбай мен Жомарт Зейнәбіл, Мәдениет саласының үздігі Гүлбаһрам Байбосынова, «Дарын» мемлекеттік жастар сыйлығының лауреаты Әсет Есжан театр ұжымының сапына қосылған болатын. Аталған өнер майталмандары көрерменге «Сюрприз» комедиясын ұсынды.
Қос ғашықтың үлкен өмірге қадам басар сәтінен бастау алатын қойылым көпшілікті бір күлдіріп, бір күрсіндірді. Жас құрақтай жайқалған қызды сүйгені ата-анасымен таныстырмақ. Осылайша екеуі алдағы отбасылық ғұмырға ақ бата арқалап аттанбақ. Алайда, арманшыл жастардың алға басар қадамына мезгілсіз қағылған есік сыртындағы кейіпкер бөгет болады. Неге? Ол кім? Не үшін ата-анамен таныстық үшін жайылған дастарқанға кедергі болды? Осы сұрақ әр көрерменнің көкейінде тұрды сол сәтте.
Мезгілсіз қағылған есік. Бірінің артынан бірі 3 еркек босағадан аттады. Бәрі де жас қыздың әлеуметтік желіге жариялаған жазбасын оқыған. Анасының естелігін желіге жүктеген қыз тірліктегі ең ардақты адамы болған әкесін іздеп жүрген. Ал үш мәрте қағылған есіктен аттаған Марат есімді үш еркек те әлгі хатта айтылғандай санаторийда демалған, Ғалия есімді бойжеткенмен аз күн тәтті сезімге тояттаған. «Неткен сәйкестік?!», «Тосын сый деп осыны айт» дедік жамыраса күлген көрермен ретінде.
Осылайша өрби-өрби өрісі құндылыққа, адамгершілік пен іңкәрлікке барып тірелген, әке мен бала арасындағы нәзік сезімге ұласатын «Сюрприз» қойылымында 5 майталман ғана көрерменді баурап алды. Шеберлік те, актерлік қуат та айрықша сезілді. Үш түрлі қызметте жүрген әкелерді, яки, Мараттарды – Дулыға, Асылбек, Жомарт, қыз рөлін Гүлбаһрам, күйеу бала кейпін Әсет сомдады. Көпшіліктің көңіліне шаттық ұялатты, қыз бен әке сағынышы шынайы көрініс тапқан қойылымда күле отырып күрсінгеніміз де жасырын емес.
Осылайша бас-аяғы екі сағатқа жетпейтін қойылым жетісулықтарға ерекше әсер етті. Театрға өзгеше леп келгендей болды. Қуанарлығы да сол, майталмандар енді Би апа театрының актерларымен бірлесіп өнер көрсетеді, өзара тәжірибе алмасады.
ӨЗ ТІЛШІМІЗ
Фото: ktk.kz
