Қазақстандағы туристік жерлер десе көпшілік кербез сұлу көкшедегі Бурабай, Шарын шатқалы, Көлсай көлдері, шырайлы Шығыстағы Катон-Қарағайды елестетеді. Алайда елімізде сіз бен біз білмейтін, бірақ табиғи сұлулығы мен тарихи құндылығы жоғары сирек кездесетін орындар қаншама. Бұл орындар Қазақстан туризмінің ашылмаған әлеуетін көрсетеді.
Қиын-Керіш шатқалы. Шығыс Қазақстан облысында орналасқан бұл өңір түрлі түсті шөгінді тау жыныстарымен ерекшеленеді. Табиғи бедері Марс планетасын еске түсіреді. Қызыл, сары, ақ түсті қабаттар күн сәулесімен шағылысып, тамаша көрініс береді. Бұл жер фотографтар мен табиғат зерттеушілері үшін таптырмас мекен болғанымен, жолының қиындығына байланысты туристер сирек келеді. «Қиын-Керіш» деп осы жол қиындықтарға байланысты қойылса керек.
Келесі аз танылған орын Ырғыз-Торғай табиғи қорығы. Батыста орналасқан бұл аймақ киіктердің мекені. Кең жазиралы дала, көркіне көз тоймайтын табиғаты кез-келген адамның жан тыныштығына себепші. Өзен-көлдері мен жабайы табиғаты туризмнің дамуына үлкен мүмкіндік береді. Қорық аумағында табиғат, адам қолы тимеген күйінде сақталған, тыныштық пен жайлылық оның ғажап үйлесімін сезіндіреді.
Саура таулары көркем табиғаты жанға сая, әдебиетпен ұштасқан нысан. Оның көкпен тілдескен жоталары күн сәулесіне шомылып, алтын түске боялғандай әсер береді. Күн ұясына кірер шақта Саура тіпті ерекше кейіпке енеді. Қызғылт күннің сәулесі тау жоталарын ашық реңкке бояп, табиғаттың мәңгілік сұлулығын көз алдыңа әкеледі. Бұл өңірге келген адам тек тауды тамашалап қана қоймай, сырласқандай күй кешеді.
Саура тауы – тек биік жоталар ғана емес, тіршіліктің үнсіз жырын сақтаған қасиетті мекен. Оның етегінен бастап шыңына дейін табиғат өз заңымен өмір сүреді. Таңғы уақытта таудың бөктерінде елік пен арқардың ізі сайрап жатады, ал биікте қыран қалықтап, кең аспанды еркін шарлайды. Жаз шыға Саура алқабы гүлге оранады. Жасыл шалғында қызғалдақтар мен бәйшешектер бас көтеріп, сары, күлгін, ақ түсті дала гүлдері тау етегін кілемдей көмкереді. Самал желмен тербелген гүлдер табиғаттың нәзік сұлулығын айқындай түседі.
Ақмешіт үңгірі де көпшілік біле бермейтін табиғи нысандардың бірі. Түркістан облысында орналасқан бұл орын – Қазақстандағы ең ірі табиғи үңгірлердің қатарына жатады. Үңгірдің ішкі кеңістігі ерекше, төбесінен түсетін жарығымен таңғалдырады. Жергілікті халық арасында аңыздар көп.
Қиын-Керіштің түрлі-түсті жоталары, Саура тауының аң-құсы мен гүлге толы бөктері, Ақмешіттің тылсым тыныштығы, туризмнің алтын ошағына айналуы тиіс мекендер.
Жұлдыз КЕНТБАЕВА
