Бүгін, 21 қаңтарда Қазақстан Қарулы Күштерінің құрамындағы ең жауапты әрі қауіпті сала мамандары – Инженерлік әскерлердің күні. Бұл мереке аясында ел қауіпсіздігі мен тыныштығын күзеткен саперлар, понтоншылар мен кинологтардың ерен еңбегі ескеріледі, – деп хабарлайды 7-su.kz ақпараттық порталы.
Инженерлік әскерлердің атқаратын қызметі қандай?
ҚР Қорғаныс министрлігі берген мәліметте Инженерлік әскерлер – тек соғыс жағдайында ғана емес, бейбіт күнде де ең ауыр міндеттерді арқалайтын құрылым екені айтылған. Олардың қызметі ауқымды әрі күрделі. Мамандардың негізгі міндеттеріне келесі жұмыстар жатады:
-
Минадан тазарту: Жергілікті аумақтарды жарылғыш заттардан залалсыздандыру және қауіпсіздікті қамтамасыз ету.
-
Өткелдер салу: Понтондық көпірлер мен паромдық өткелдер арқылы әскер мен техниканың қозғалысын ұйымдастыру.
-
Фортификация: Әскери бекіністер мен қорғаныс құрылыстарын тұрғызу.
-
Сумен қамту: Далалық жағдайда су көздерін тауып, оны тазарту және әскерді сумен қамтамасыз ету.
Бұл мамандық иелерінен жоғары кәсіби дайындық пен темірдей тәртіп талап етіледі. Бүгінде әскерлер заманауи робототехникамен, жер қазу машиналарымен және барлау құралдарымен жабдықталған.
Төтенше жағдайлар мен халықаралық миссиялар
Әскери инженерлердің көмегі табиғи апаттар кезінде де өте маңызды. Мәселен, 2024 жылғы көктемгі су тасқыны кезінде инженерлік бөлімшелер Ойыл және Есіл өзендері арқылы паром өткелдерін құрды. Соның нәтижесінде 3 мыңнан астам адам қауіпсіз жерге көшіріліп, 1,5 мың техника өткізілді және 400 тоннадан астам гуманитарлық көмек жеткізілді.
Сонымен қатар қазақстандық инженерлер халықаралық аренада да үлкен абыройға ие. Ирактағы бітімгершілік операциясы кезінде біздің мамандар 4 млн-нан астам жарылғыш затты залалсыздандырып, 6,7 мың текше метр суды тазартты. Бұл көрсеткіштер отандық инженерлердің жоғары біліктілігін айқын көрсетеді.
Қазіргі таңда инженерлік әскерлер ұлттық қауіпсіздік жүйесінің ажырамас бөлігі ретінде дамып келеді. Олардың кәсібилігі мен заманауи техникамен жабдықталуы ел шекарасының бүтіндігі мен азаматтардың тыныштығын сақтаудың кепілі деп танылады.
