Өңірлік коммуникациялар қызметінде өткен брифингте облыстағы газдандыру жұмыстары сөз болды. Жиынға Жетісу облыстық энергетика және тұрғын үй-коммуналдық шаруашылық басқармасының бөлім басшысы Азамат Кемелов, «QAZAQGAZ AIMAQ» АҚ Жетісу өндірістік филиалының директоры Айбек Ерғали және газбен жабдықтау және өткізу қызметінің бастығы Дәулет Өсербаев қатысты.
– Ақсу, Сарқан және Алакөл аудандарының елді мекендерін табиғи газбен қамтамасыз ету мақсатында ұзындығы 302 км, құны 124,8 млрд теңге болатын «Талдықорған – Үшарал» магистральдық газ құбыры және 6 АГРС пайдалануға берілді. Халық саны 133,9 мың адамды құрайтын 84 елді мекенді газдандыру үшін жеке инвестициялар есебінен жобалық-сметалық құжаттаманы әзірлеу жұмыстары жүргізілуде. Құрылыс-монтаж жұмыстары 2026-2027 жылдарға жоспарланған. Нәтижесінде облысты газдандыру деңгейі 92,8%-ға жетіп, 210 елді мекен қамтылады, 652,3 мыңнан астам адам табиғи газға қол жеткізеді, – деді Азамат Шаймерденұлы.
Спикер Айбек Ерғали тариф мәселесіне тоқталды. Оның айтуынша, 2025 жылғы 1 қыркүйектен бастап 1 м³ табиғи газдың бағасы ҚҚС-пен бірге 45,37 теңге деңгейінде бекітілген.
– Алдыңғы жылыту маусымында тауарлық газдың бөлшек саудадағы бағасы 1 м³ үшін 38,24 теңгені құрады. Айырмашылық – 7,12 теңге. Ал 2026 жылғы 1 қаңтардан бастап ҚҚС мөлшерлемесінің 16%-ға дейін өсуіне байланысты тұрмыстық тұтынушылар үшін газ бағасы 1 м³ үшін 46,99 теңге болады, – деді ол.
Ал Дәулет Өсербаев газ есептегіштерін тексеру мерзімі жайлы сөз қозғады. Тұрмыстық газ есептегіштері үшін бірыңғай тексеруаралық интервал – 5 жыл. Егер есептегіш тексеріліп, оң қорытынды берілсе, есептелген газ көлемін 6 айдан аспайтын мерзімге қайта есептеуге (түзетуге) мүмкіндік бар. Талдықорған қаласы бойынша желтоқсан айында 1 516 тұтынушыға (есептегіш мерзімі өтуіне байланысты) норматив бойынша есептеу жүргізілді. Ондағы сома 26 000-нан 158 800 теңгеге дейін жеткен.
Басқосу барысында тұтынушылар тарапынан қойылған өзекті сұрақтарға жауап берілді. Айталық, «Неге төлем көп шықты?» деген сауалға мамандар төлемнің артуы күннің суытуына және тұтыну көлемінің өсуіне байланысты екенін, сол үшін газды үнемдеп пайдалануды ұсынды. «Есептегіш болса, неге ауданға (квадратураға) қарап төлейміз?» деген сұрақ та жауапсыз қалмады. Бұл тек есептегіштің 5 жылдық тексеру мерзімі өтіп кеткен жағдайда қолданылатын шара. Қазіргі таңда 40 мыңнан астам абоненттің 1,5 мыңында осындай мәселе бар. Тұтынушыларға есептегіштің техникалық паспортындағы тексеру мерзімін мұқият қадағалау ұсынылады.
Арайлым Абылғазы
ЖУ студенті
