Талдықорғандағы «Жастар» спорт сарайында волейболдан ерлер арасында Ұлттық лиганың ІІІ кіші тур ойындары өтіп жатыр. Жалпы турнирлік кестенің көшін бастап тұрған «Жетісу» «Б» тобында «Тараз», «Буревестник» (Алматы) және «Ұшқын-Көкшетау» командаларымен кездеседі. Жарыстың екінші күнінде Жетісу облысының әкімі Бейбіт Исабаев ойынды арнайы келіп көріп, волейболшыларға қолдау білдірді, – деп хабарлайды 7-su.kz ақпараттық порталы.
Бірінші күні «Тараз» командасын 3:0 (25:15, 25:22, 25:22) есебімен жеңген «Жетісу» екінші ойын күні «Буревестникті» де 3:0 (25:21, 25:22, 25:18) нәтижесімен ұтты. Ойын соңында Жетісу облысының әкімі Бейбіт Исабаев командаға сенетіндігін, осы қарқыннан айырлмау қажеттігін айтып, алдағы ойындарға сәттілік тіледі.
– Өз алаңымызда болып жатқаннан кейін жауапкершілік жоғары. Өз жанкүйерлеріміздің алдында жеңісті бергіміз келмейді. Барынша қателіксіз ойнап, кездесуді сенімді аяқтағымыз келеді. Өз тобымыздағы соңғы ойын қалды, одан кейін үлкен тур болады. Соған дайындаламыз, – дейді «Жетісу» волейбол клубының ойыншысы Ислам Асым.
«Буревестникпен» болған ойында үздік нәтиже көрсеткен үштік:
- Никита Швалев – 15 ұпай (12 шабуыл, 3 тосқауыл).
- Михаил Устинов – 11 ұпай (11 шабуыл).
- Владислав Кунченко – 10 ұпай (8 шабуыл, 1 эйс, 1 тосқауыл).
«Жетісу» ІІІ кіші турдағы соңғы ойынын «Ұшқын-Көкшетауға» қарсы өткізеді. Одан кейін Оралда болатын ІІІ үлкен турға барып, бірінші кездесуде былтырғы маусымда ел чемпионы болған «Жайық» командасымен Қазақстан Суперкубогын сарапқа салады. Жалпы турнирлік кестеде «Жетісу» 41 ұпаймен көш бастап келеді. Одан кейін 36 ұпаймен «Ақтөбе», 33 ұпаймен «Жайық» (Орал) командалары келеді.
