Белгілі актер, ММА-дан (аралас жекпе-жек) «OCTAGON», «Dala Fighting Championship», «Nomad» сынды лигалардың жұлдызы, медиа жауынгер 30 жастағы Еркебұлан Тоқтар дайындығын күшейту үшін АҚШ-қа кетті. «Еркебұлан, қайдасың?», – деп іздеу салып жатқан қарсыластарына шетінен жауап қайырып, алдағы жекпе-жегіндегі қарсыласымен келісімшартқа қол қойды, – деп хабарлайды 7-su.kz ақпараттық порталы.
Еркебұлан Тоқтардың келесі қарсыласы – Шахзод Узоков. Өзбекстандық спортшы көпшілікке «Голд» лақап атымен белгілі. Еркебұлан келісімшартқа қол қойғанымен, кездесу қашан және қайда өтендігі әлі белгісіз.
Өзі әлеуметтік желіде енді екі ай Америкадағы танымал «American top Team» залында жаттығатынын айтты.
Жазбасында: «Бізде де мықты жаттықтырушы көп, бірақ жаттығу тек оларға байланысты емес. Кіммен дайындалатының, серіктесің кім екені маңызды. Мәселен, баратын залда бәрі UFC палуандары, лигалардың чемпиондары. Мен мұндай адамдармен тез өсемін, ал Алматыда нақты мамандандырылған зал жоқ», – дейді.
Кейінгі кездесуінде Еркебұлан кәсіпқой бокстағы екінші жекпе-жегін Өзбекстанда өткізіп, жергілікті спортшы Тимур Никулинді бірінші раундта нокаутқа жіберді.
Еркебұлан жалпы ММА-да 11 жекпе-жекте жеңіске жетіп, 3 кездесуде жеңілді.
