Еліміздің кәсіпкерлері үшін халықаралық қаржы нарығына жол ашылмақ. Сенат Қазақстан Үкіметі мен ОПЕК халықаралық даму қоры арасындағы негіздемелік келісімді ратификациялады. Бұл құжат отандық жеке компанияларға ірі инвестициялық жобаларды жүзеге асыру үшін 400 млрд теңгеге дейін несие алуға мүмкіндік береді, – деп хабарлайды 7-su.kz ақпараттық порталы Tengrinews.kz сайтына сілтеме жасап.
ОПЕК қоры деген не және ол кімге тиімді?
ОПЕК халықаралық даму қоры (OPEC Fund) – дамушы елдердің экономикасын қолдау үшін құрылған жаһандық институт. Вена қаласында штаб-пәтері орналасқан бұл ұйым негізінен инфрақұрылымдық және әлеуметтік маңызы бар жобаларды қаржыландырады.
Әділет вице-министрі Бекболат Молдабековтің айтуынша, қор қаржыны шетелдік валютада (доллар немесе еуро) береді. Ең басты артықшылығы – пайыздық мөлшерлемесі өте төмен, шамамен 2,5-5 пайыз аралығында. Бұл еліміздегі екінші деңгейлі банктердің ұсыныстарынан әлдеқайда арзан.
Қаражат қай салаларға жұмсалады?
Келісім бойынша алдағы 5 жылда қазақстандық бизнес 400 млрд теңгеге дейінгі лимит аясында келесі бағыттар бойынша жобаларын ұсына алады:
-
Инфрақұрылым: жолдар, логистикалық орталықтар мен өндірістік нысандар салу;
-
Цифрландыру: жаңа технологиялар мен инновациялық шешімдерді енгізу;
-
Азық-түлік қауіпсіздігі: ауыл шаруашылығы өнімдерін терең өңдеу жобалары;
-
Энергетика: «жасыл» экономикаға өту және климаттың өзгеруімен күрес;
-
Шағын және орта бизнес: кәсіпкерліктің өсуіне жағдай жасау.
Кәсіпкерлер бұл көмекті қалай алады?
Көптеген бизнес иелері үшін бұл келісім бюрократиялық кедергілерді азайтады. Келісім толық күшіне енген соң, қазақстандық компаниялар қордың арнайы электронды платформасы арқылы тікелей өтінім бере алады. Бұл мемлекеттік кепілдіксіз, тікелей жеке сектор мен қор арасындағы байланысты нығайтады.
Мұндай қадам Қазақстан экономикасына сыртқы инвестиция тартуға және жергілікті өндірісті халықаралық стандарттарға сәйкестендіруге жол ашады. Бұған дейін Мажіліс мақұлдаған бұл құжат енді еліміздегі кәсіпкерлік ортаның сапалық тұрғыдан өсуіне серпін бермек.
