Қазақстан құрамасы тау шаңғысы спортынан Германияның Гармиш-Партенкирхен қаласында өткен FIS халықаралық турнирінде сәтті өнер көрсетті, – деп хабарлайды 7-su.kz ақпараттық порталы Kazinform агенттігіне сілтеме жасап.
Аталған додада ел намысын Александра Скороходова мен Ростислав Хохлов қорғады. Айта кетерлігі, бұл спортшылар 2026 жылы өтетін қысқы Олимпиада ойындарында Қазақстанның атынан бақ сынайтын болады. Сондықтан бұл турнир олар үшін маңызды дайындық кезеңі.
Ұлттық олимпиадалық комитеттің мәліметінше, Александра Скороходова бірден екі бағыт бойынша үздік ондыққа кірді. Үлкен жылдамдықпен төмен түсу (downhill) сайысында спортшымыз 8-орынға тұрақтады. Супер гигант (super-G) бағдарламасында қазақстандық шаңғышы жоғары шеберлік танытып, 6-орынды иеленді.
Ерлер арасында сынға түскен Ростислав Хохлов та жақсы нәтиже көрсетті. Ол үлкен жылдамдықпен төмен түсу сайысында екі мәрте бақ сынап, 12-15 орындардан көрінді. Ал супер гигант сайысында мәреге 23-ші болып келді.
Гармиш-Партенкирхендегі жарыс – әлемнің мықты тау шаңғышылары жиналатын беделді додалардың бірі. Біздің спортшылардың мұндай деңгейдегі турнирде алғашқы ондыққа енуі – отандық тау шаңғысы спортының даму деңгейінің көрсеткіші. Александра мен Ростислав енді алдағы Олимпиадаға дайындықтарын одан ары ширата түспек.
