Америкалық UFC промоушені барлық салмақ дәрежелері бойынша рейтингтерді жаңартты. Өкініштісі сол, жаңартылған тізімде қазақстандық жанкүйерлерді елең еткізген өзгеріс орын алды, – деп хабарлайды 7-su.kz ақпараттық порталы NewTimes.kz агенттігіне сілтеме жасап.
Осыған дейін жартылай орта салмақ дәрежесінде екінші сатыда тұрған және чемпиондық белбеуге басты үміткерлердің бірі саналған Шавкат Рахмонов ресми рейтингтен толықтай шығарылды.
Шавкат рейтингтен кеткен соң, дивизиондағы орындар айтарлықтай өзгерді. Қазіргі таңда рейтингтің көшбасшысы болып Джек Делла Маддалена қала берді. Ал Рахмоновтың бұрынғы қарсыласы Иэн Гэрри екінші сатыға көтерілсе, Майкл Моралес үздік үштікті түйіндеді. Айта кетерлігі, бұл дивизионда чемпиондық белбеу қазіргі уақытта Ислам Махачевтың иелігінде.
Жаңартылған ТОП-15 тізімі мынадай:
1 (1). Джек Делла Маддалена
2 (3). Иэн Мачадо Гэрри
3 (4). Майкл Моралес
4 (5). Белал Мухаммад
5 (6). Карлос Пратес
6 (7). Шон Брэди
7 (8). Камару Усман
8 (9). Леон Эдвардс
9 (10). Хоакин Бакли
10 (12). Гилберт Бёрнс
11 (11). Габриэль Бонфим
12 (13). Джефф Нил
13 (14). Колби Ковингтон
14 (15). Дэниэл Родригес
15 (-). Майкл Пейдж.
Бұл шешімнің астарында спорттық себептер емес, денсаулық жағдайы жатқаны белгілі болды. Осыған дейін әлеуметтік желілерде Шавкаттың Алматыда балдақпен жүрген видеосы тараған еді. Спортшы бұл жағдайға қатысты ресми мәлімдеме жасап, жарақаттарының әлі де сыр беріп жүргенін айтты.
«Ескі жарақаттарымның салдарынан толық оңалу үшін уақыт қажет. Оған қоса ота жасалды, сондықтан UFC-ге оралуым сәл кейінге шегеріледі», – деді Шавкат Рахмонов.
UFC ережесі бойынша, егер спортшы ұзақ уақыт бойы жекпе-жекке шықпаса немесе денсаулығына байланысты белгісіз мерзімге демалыс алса, ол рейтингтен уақытша алынып тасталуы мүмкін. Бұл Шавкаттың карьерасы аяқталды деген сөз емес, тек толық айығып, октагонға қайта оралғанда ол өз орнын қайта талап ете алады.
Қазіргі уақытта жанкүйерлер «Номадтың» тезірек сауығып, қатарға қосылуын тілеп отыр. Шавкаттың қайта оралуы қазақ спорты үшін үлкен оқиға болары анық, өйткені ол әлі де өз дивизионындағы ең қауіпті файтерлердің бірі болып қала береді.
