Конституциялық реформалар жөніндегі комиссия Қазақстан Республикасының жаңа Ата Заңының жобасын жариялап, ой-пікірімізді ортаға салып, өз ұсынысымызды айтуға мүмкіндік беріп отыр.
Бұл құжат азаматтардан, саяси партиялардан, қоғамдық ұйымдар мен сарапшылардан түскен ұсыныстарды мұқият талдаудың, ашық қоғамдық талқылаулардың, сондай-ақ жаңа нормалар мен ережелерді жан-жақты әрі тиянақты пысықтаудың нәтижесінде пайда болды. Конституциялық реформа ел Президенті Қасым-Жомарт Тоқаевтың Қазақ-станда бір палаталы Парламент құру жөніндегі бастамасының негізінде туындады.
Президент бұл идеяны 2025 жылғы 8 қыркүйекте өзінің халыққа арнаған жыл сайынғы Жолдауында елдің саяси жүйесін кешенді жаңғырту және жасанды интеллект дәуірінде Қазақстанның әлеуметтік-экономикалық дамуына елеулі оң серпін беру мақсатында айтқан болатын.
Өткен жылы Парламенттік реформаны іске асыру жөніндегі жұмыс тобын құру туралы өкімге қол қойылды. Оның құрамына белгілі құқықтанушы ғалымдар, сарапшылар, саяси партиялар мен қоғамдық ұйымдардың өкілі кірді. Алайда талқылауларға барлық белсенді азамат қосылып, өз пікірлері мен ұсыныстарын e-Otinish және eGov порталдары арқылы жолдай бастады. Осылайша, жаңа реформаны кеңінен әрі қарқынды талқылау шамамен алты айға созылды. Осы кезең ішінде жұмыс тобы азаматтардан түскен екі мыңнан аса ұсынысты жан-жақты қарап, жүйелеп шықты. Ұлттық құрылтайдың V отырысында Мемлекет басшысы атқарылған жұмыстың қорытындысын шығарып, алдағы өзгерістерге қатысты өз көзқарасын білдірді.
Қасым-Жомарт Тоқаев, парламенттік реформа аясында бастапқыда Ата Заңның шамамен 40-бабына өзгерістер енгізу көзделгенін атап өтті. Алайда жұмыс барысында өзгерістер көлемі әлдеқайда ауқымды екені айқындалып, олар саяси және қоғамдық өмірдің көптеген өзге де қырын қамтитыны белгілі болды.
Ризван САКИОВА,
кәсіпкерлер палатасының өңірлік кеңесінің мүшесі
