Волейболдан ерлер командалары арасында Оралда ел чемпионатының ІІІ үлкен тур ойындары басталды. «Жетісу» биылғы Қазақстан кубогының иегері есебінде бірінші матчты (жеңіске жеткені үшін үш ұпай алды және Суперкубокқа ие болды) былтырғы маусымның жеңімпазы «Жайыққа» қарсы өткізіп, 3:0 (25:18, 25:21, 25:20) есебімен жеңді. Осылайша «Жетісу» ерлер командасы өз тарихында тұңғыш рет Қазақстан Суперкубогында жеңіске жетті,-деп хабарлайды 7-su.kz ақпараттық порталы.
«Жетісу» ерлер командасы биылғы маусымды сәтті бастады. Әуелі Астанда өткен ел Кубогында одан кейін міне Оралда болған Қазақстан Суперкубогында жеңіске жетті. Ал чемпионатта турнирлік кестенің көшін бастап келеді.
— Жетісу жерінде жалпы волейболдың өзіндік дәстүрі қалыптасқан. Бүгінгі жеңіс кешегі болған сілкіністің емес, талай жылғы еңбектің жемісі. Марат Адыршев ұлдарымызды тұрақты жаттықтырып, жастайынан осы деңгейге дейін жеткізгеніне он жылға жуықтады. Ендігі меже ел чемпионаты екендігі анық. Бар күшімізді соған саламыз. Биыл қыздарымыз да, ұлдарымыз да жеңіске жетіп, барша жетісулықтарды қуантып жатыр. Біз оң бағытты бетке алдық, енді нәтижені арттыра түскіміз келеді. Осы тұрғыда облыс басшылығы бізге барлық жағдайды жасап отыр,- деді өз сөзінде «Жетісу» волейбол клубының директоры Нияз Жантілеуов.
Биыл «Жетісу» қыздар волейбол клубы өз тарихында бесінші Суперкубокты алды, былтырғы маусымда өзі қатысқан жарыстың бәрінде жеңіске жетті. Ал ерлер командасы биыл бір маусымда барлық кубокты түгендеп көрмек. Алғашқы екі кубок (ел Кубогымен, Қазақстан Суперкубогы) Талдықорғанда орналасқан еліміздегі әзірге жалғыз волейбол базасының сөресінде тұр.
