Достық үйінде «Азаматтық қоғам және конституциялық өзгерістер» тақырыбында өңірдегі сарапшылар мен жетекші журналистер клубының кезекті отырысы өтті.
Басқосуға аймақтағы қоғам қайраткерлері, журналистер клубының мүшелері, сарапшылар мен өзге де бірлестіктердің өкілдері қатысты.
Жиналған қауым алдында сөз алған журналистер клубының төрағасы, Қазақстан Республикасы Президенті сыйлығының иегері, академик Атсалим Идигов қазіргі елімізде жан-жақты талқыланып жатқан конституциялық реформалардың рөлін баса дәріптеп, жүргізіліп жатқан өзгерістер кезеңіндегі журналистердің жауапкершілігін айрықша атап өтті.
– Ата Заң – мемлекетіміздің құқықтық іргетасы әрі ұлттық құндылықтарды айқындайтын басты құжат. Бүгінде аталған заңның 80 пайыздан астамы жаңартылуда. Бұл, әрине, заман талабы, дамудың тың бастамалары екені айдан анық. Осы орайда ел Конституциясына енгізілген өзгерістерді қарапайым халыққа жеткізуде БАҚ өкілдерінің атқаратын жұмысы ауқымды. Сондықтан да мен қаламгер әріптестеріміз заңдағы әрбір өзгерісті жұртқа үлкен жауапкершілікпен жеткізеді деп сенемін, – деді Атсалим Саламұлы.
Осыдан соң облыстық қоғамдық кеңестің мүшесі Құрметбек Сансызбайұлы елдегі конституциялық реформалардың әр азамат үшін маңызы зор екеніне тоқталып, өз пікірін білдірді.
– Жаңа заң тармақтарында елдің ішкі және сыртқы саясаты, халықтың әлеуеті мен әлеуметтік жағдайы, экономикалық ахуалы, құндылықтары толық қорғалған. Нақты айтқанда, адам ресурстарының өзгерген әлемі, асыл қасиеттері, бостандық, еркіндік, жауапкершілік секілді ұғымдар жаңа дәуірдің демократиясына сай мәдениеттілікпен тегіс қамтылған. Бұл өзгерістер «Заң мен тәртіп», «Әділетті Қазақстан» ұстанымы негізінде толыққанды жауап бере алатын заң екеніне сенемін әрі қолдаймын, – деді кеңес мүшесі.
Жиын барысында өзге де қатысушылар өздерінің орамды ой-пікірлерін айтып, ортақ талқы ұйымдастырды.
Айдын КӘЛІМХАН
